കാസര്‍കോട്: ടാപ്പിങ് തൊഴിലാളിയെ വാടകവീട്ടില്‍ മരിച്ച നിലയില്‍ കണ്ടെത്തി. ആലക്കോട് ശാന്തിപുരം സ്വദേശി കുരിശുകുന്നേല്‍ ജോസഫിന്റെ മകന്‍ സജി ജോസഫ് (54) ആണ് മരിച്ചത്. തിങ്കളാഴ്ച വൈകീട്ട് കരിന്തളം പെരിയങ്ങാനത്തെ വാടക വീട്ടിലാണ് ഇദ്ദേഹത്തെ അബോധാവസ്ഥയില്‍ കിടക്കുന്നത് കണ്ടത്. പെരിയങ്ങാനത്തെ ജോഷി എന്നയാളുടെ തോട്ടത്തിലെ ടാപ്പിങിനായി എത്തിയതായിരുന്ന സജി. തിങ്കളാഴ്ച രാവിലെ ജോലിക്കെത്താത്തതിനാല്‍ മറ്റു തൊഴിലാളികള്‍ ഫോണ്‍വിളിച്ചപ്പോള്‍ സജി അറ്റന്‍ഡ്‌ചെയ്തിരുന്നില്ല. തുടര്‍ന്ന് താമസിക്കുന്ന വാടകവീട്ടിലെത്തിയപ്പോള്‍ അബോധാവസ്ഥയില്‍ കണ്ടെത്തുകയായിരുന്നു. ഉടന്‍ ആശുപത്രിയില്‍ എത്തിച്ചെങ്കിലും മരിച്ചിരുന്നു. ഹൃദയസ്തംഭനമാണ് മരണകാരണം എന്നാണ് പ്രാഥമിക നിഗമനം. മൃതദേഹം പരിയാരം കണ്ണൂര്‍ ഗവ.മെഡിക്കല്‍ കോളേജ് മോര്‍ച്ചറിയിലേക്ക് മാറ്റി.