കാസർകോട്: മണൽ മാഫിയയ്ക്ക് എതിരെ ശക്തമായ നടപടികൾ സ്വീകരിച്ച് കുമ്പള പൊലീസ്. കുമ്പള ക്രൈം എസ് ഐ പ്രദീപ്കുമാറും സംഘവും ശനിയാഴ്ച രാവിലെ രണ്ട് ടിപ്പർ ലോറികളും ഒരു ജെസിബിയും പിടികൂടി. കുമ്പള സീതാംഗോളി ബംബ്രാണ ഭാഗങ്ങളിൽ വ്യാപകമായി ചെമ്മണ്ണ് കടത്തുന്നുണ്ടെന്ന വിവരം ജില്ലാ പൊലീസ് മേധാവിക്ക് ലഭിച്ചതിന്റെ അടിസ്ഥാനത്തിലാണ് പരിശോധന ശക്തമാക്കിയത്. കസ്റ്റഡിയിൽ എടുത്ത വാഹനങ്ങൾ റിപ്പോർട്ട് സഹിതം ആർ.ഡി.ഒക്ക് കൈമാറുമെന്ന് കുമ്പള പോലീസ് അറിയിച്ചു. എസ് ഐ ശരത് ബാബു, സി പി ഒമാരായ സുധീഷ്, അജീഷ് എന്നിവരും വാഹനങ്ങൾ പിടികൂടിയ സംഘത്തിൽ ഉണ്ടായിരുന്നു.