കാസര്‍കോട്: നിര്‍മ്മാണം നടന്നു കൊണ്ടിരിക്കുന്ന സ്ഥലത്തു നിന്നും ഇരുമ്പു ജാക്കികള്‍ കവര്‍ന്ന് ടെമ്പോയില്‍ കടത്തിക്കൊണ്ടു പോയ കേസില്‍ രണ്ടു പേര്‍ അറസ്റ്റില്‍. കാഞ്ഞങ്ങാട്, മാവുങ്കാലിലെ മനു (38), ബല്ലയിലെ മനീഷ് (42) എന്നിവരെയാണ് ഹൊസ്ദുര്‍ഗ് പൊലീസ് ഇന്‍സ്‌പെക്ടര്‍ പി. അജിത്ത് കുമാറിന്റെ നിര്‍ദ്ദേശ പ്രകാരം എസ്.ഐ എം.വി വിഷ്ണു പ്രസാദും സംഘവും അറസ്റ്റു ചെയ്തത്.
തിങ്കളാഴ്ച വൈകുന്നേരം മൂന്നു മണിയോടെയാണ് കേസിനാസ്പദമായ സംഭവം. എന്‍.എച്ച്.എം ഓഫീസിന്റെ കീഴില്‍ പുതിയ കോട്ടയില്‍ പണിയുന്ന കെട്ടിടത്തിന്റെ നിര്‍മ്മാണ ആവശ്യത്തിനു എത്തിച്ചതായിരുന്നു നിര്‍മ്മാണ സാധനങ്ങള്‍. ഓട്ടോ ടെമ്പോയില്‍ എത്തിയ മൂന്നംഗ സംഘം അട്ടിവച്ചിരുന്ന ഇരുമ്പു ജാക്കികളില്‍ നിന്നു 10 എണ്ണം മോഷ്ടിച്ച് കടത്തിയെന്നാണ് കേസ്. കാല്‍ ലക്ഷത്തോളം രൂപയുടെ നഷ്ടം കണക്കാക്കുന്നു. നിര്‍മ്മാണ കരാര്‍ കമ്പനി ജീവനക്കാരന്‍ സി.എ മുഹമ്മദ് സബീനിന്റെ പരാതി പ്രകാരമാണ് ഹൊസ്ദുര്‍ഗ് പൊലീസ് കേസെടുത്ത് അന്വേഷണം നടത്തി പ്രതികളെ അറസ്റ്റു ചെയ്തത്. മൂന്നാം പ്രതിയെ കണ്ടെത്താനുള്ള ശ്രമം തുടരുകയാണെന്ന് പൊലീസ് പറഞ്ഞു.