കാസര്‍കോട്: അന്യസംസ്ഥാന തൊഴിലാളിയെ കാണാനില്ല. പാണത്തൂര്‍ മഞ്ഞടുക്കം പുഴയില്‍ ഒഴുക്കില്‍പ്പെട്ടതായി സംശയം. ഇരുചക്രവാഹനവും ഒഴുകിപ്പോയി. അഗ്‌നിരക്ഷാസേനയുടെയും സ്‌കൂബാ സംഘത്തിന്റെയും നേതൃത്വത്തില്‍ പുഴയില്‍ തിരച്ചില്‍ നടത്തിയെങ്കിലും കണ്ടെത്താനായില്ല. കര്‍ണാടക ബല്‍ഗാം സ്വദേശി ദുര്‍ഗപ്പ (അനില്‍-18) യെയാണ് വ്യാഴാഴ്ച ഉച്ചയോടെ കാണാതായത്. പാണത്തൂരിലെ പ്ലാന്റേഷന്‍ കോര്‍പ്പറേഷന്‍ കശുമാവിന്‍ തോട്ടത്തില്‍ കൈതച്ചക്ക കൃഷിക്കായി നിലമൊരുക്കാന്‍ എത്തിയ മണ്ണുമാന്തി യന്ത്രത്തിന്റെ ഡ്രൈവറുടെ സഹായിയായിരുന്നു. ഉച്ചഭക്ഷണം എടുക്കാനായി താമസസ്ഥലമായ കരിക്കെ തോട്ടത്തിലേക്ക് പോയതായിരുന്നു ദുര്‍ഗപ്പ. എന്നാല്‍ വൈകുന്നേരമായിട്ടും തിരിച്ചെത്താതായതോടെ ഇയാളുടെ ബന്ധുവും ഡ്രൈവറുമായ കുടക് സ്വദേശി യുവനന്ദ രാജപുരം പൊലീസില്‍ പരാതി നല്‍കുകയായിരുന്നു. കനത്ത മഴയെത്തുടര്‍ന്ന് പുഴയില്‍ വലിയതോതില്‍ വെള്ളവും ഒഴുക്കുമുള്ളതിനാല്‍ തിരച്ചിലും ദുഷ്‌കരമായി. കുറ്റിക്കോലില്‍നിന്നെത്തിയ അഗ്‌നിരക്ഷാസേനാംഗങ്ങളും കാഞ്ഞങ്ങാട്, തൃക്കരിപ്പൂര്‍, കാസര്‍കോട് എന്നിവിടങ്ങളില്‍നിന്നെത്തിയ സ്‌കൂബാ സംഘവുമാണ് വെള്ളിയാഴ്ച രാവിലെ മുതല്‍ തിരച്ചില്‍ നടത്തിയിരുന്നു. ശനിയാഴ്ചയും തിരച്ചില്‍ നടത്തുന്നുണ്ട്.
മഴക്കാല അപകടം; സ്‌കൂളുകള്‍ക്ക് കര്‍ശന സുരക്ഷാ നിര്‍ദ്ദേശം
Saturday, 19 July 2025, 15:53
