കാസര്‍കോട്: നീലേശ്വരം തൈക്കടപ്പുറം അഴിത്തലയില്‍ മല്‍സ്യബന്ധനത്തിന് പോയ തോണി മറിഞ്ഞ് അപകടത്തില്‍പെട്ടു. തോണിയിലുണ്ടായിരുന്ന പതിനാലുപേരെയും രക്ഷപ്പെടുത്തി. പരിക്കേറ്റ 4 പേരെ നീലേശ്വരത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ബുധനാഴ്ച രാവിലെ ആറുമണിയോടെ അഴിത്തല പുലിമുട്ടിന് സമീപത്തായിരുന്നു അപകടം. അനന്തംപള്ള മൂത്തല്‍ ഹൗസിലെ എം അര്‍ജുനിന്റെ ഉടമസ്ഥതയിലുള്ള സീ ഫ്രണ്ട്‌സ് എന്ന ഫൈബര്‍ തോണിയാണ് അപകടത്തില്‍ പെട്ടത്. കൂറ്റന്‍ തിരമാലയില്‍പെട്ട് തോണി മറിയുകയായിരുന്നു. പ്രക്ഷുബ്ധമായ കടലില്‍ വീണ ഇവര്‍ ക്യാരിയര്‍ വള്ളത്തില്‍ നീന്തിക്കയറി കരയ്ക്കത്തി. ശക്തമായ തിരയടിച്ച് മറിഞ്ഞ തോണി വലിഞ്ഞ് കടലിലേക്ക് ഒഴുകിപ്പോയി. തോണിയെ കരക്കടുപ്പിക്കുവാന്‍ തീരദേശ പൊലീസ് സ്ഥലത്തെത്തിയിട്ടുണ്ട്. കടല്‍ക്ഷോഭമുള്ളതിനാല്‍ കേരള തീരത്ത് മല്‍സ്യബന്ധനത്തിന് വിലക്കുണ്ട്.