-പി പി ചെറിയാന്‍
വാഷിങ്ട്ടന്‍: കൊമേഡിയന്‍ റോസി ഒ’ഡോണലിന്റെ യുഎസ് പൗരത്വം റദ്ദാക്കുമെന്ന് പ്രസിഡന്റ് ഡൊണാള്‍ഡ് ട്രംപ് ശനിയാഴ്ച ഭീഷണിപ്പെടുത്തി. റോസി ഒ’ഡോണള്‍ ‘മനുഷ്യത്വത്തിന് ഭീഷണി’യാണെന്ന് ട്രമ്പ് സാമൂഹ്യ മാധ്യമത്തില്‍ കുറിച്ചു.
‘റോസി ഒ’ഡോണല്‍ നമ്മുടെ മഹത്തായ രാജ്യത്തിന്റെ താല്‍പ്പര്യങ്ങള്‍ക്ക് അനുയോജ്യമല്ലാത്തതിനാല്‍, അവരുടെ പൗരത്വം പിന്‍വലിക്കുന്നതിനെക്കുറിച്ച് ഞാന്‍ ഗൗരവമായി ആലോചിക്കുന്നു. അവര്‍ മനുഷ്യരാശിക്ക് ഭീഷണിയാണ്, അവര്‍ക്ക് വേണമെങ്കില്‍ അവരുടെ അയര്‍ലന്‍ഡ് എന്ന അത്ഭുതകരമായ രാജ്യത്ത് തന്നെ തുടരട്ടെ. ദൈവം അമേരിക്കയെ അനുഗ്രഹിക്കട്ടെ!’ ട്രംപ് ശനിയാഴ്ച ട്രൂത്ത് സോഷ്യലില്‍ ഒരു പോസ്റ്റില്‍ എഴുതി.
ഭരണഘടനാപരമായി, ട്രംപ് ഭീഷണിപ്പെടുത്തുന്നതുപോലെ, ഒരാളുടെ പൗരത്വം ‘എടുക്കാന്‍’ യുഎസ് പ്രസിഡന്റിന് നിയമപരമായി അധികാരമില്ല. 14-ാം ഭേദഗതി യുണൈറ്റഡ് സ്റ്റേറ്റ്‌സില്‍ ജനിച്ച ആര്‍ക്കും പൗരത്വം ഉറപ്പുനല്‍കുന്നു. ഒ’ഡോണല്‍ ന്യൂയോര്‍ക്കിലെ കോമാക്കിലാണ് ജനിച്ചതെന്ന് ഐഎംഡിബി റിപ്പോര്‍ട്ട് ചെയ്തിട്ടുണ്ട്.
ട്രംപിന്റെ ട്രൂത്ത് സോഷ്യല്‍ പോസ്റ്റിന് മറുപടിയായി ഒ’ഡൊണല്‍ ഇങ്ങനെ എഴുതി, ‘ഹേ ഡൊണാള്‍ഡ് നിങ്ങള്‍ വീണ്ടും അസ്വസ്ഥനാണോ? 18 വര്‍ഷത്തിനു ശേഷവും ഞാന്‍ ഇപ്പോഴും നിങ്ങളുടെ തകര്‍ന്ന തലച്ചോറില്‍ സ്വതന്ത്രയായി ജീവിക്കുന്നു.’
തന്റെ പൗരത്വം റദ്ദാക്കുമെന്ന ട്രംപിന്റെ ഭീഷണികളെയും ഒ’ഡൊണല്‍ തന്റെ അടിക്കുറിപ്പില്‍ പരാമര്‍ശിച്ചു, ജനപ്രിയ പുസ്തക പരമ്പരയിലെയും എച്ച്ബിഒ ഷോയായ ‘ഗെയിം ഓഫ് ത്രോണ്‍സില്‍’ നിന്നുമുള്ള സാങ്കല്‍പ്പിക കിംഗ് ജോഫ്രിയുമായി അദ്ദേഹത്തെ താരതമ്യം ചെയ്തു.
