കാസർകോട്: കോട്ടയം മെഡിക്കൽ കോളേജ് ആശുപത്രിയിൽ മൂന്നു നില കെട്ടിടം തകർന്നു വീണ് സ്ത്രീ മരിച്ചതിന് സമാനമായ ദുരന്തത്തിന് കാതോർത്ത് കാസർകോട്ടും ഒരു ആശുപത്രി കെട്ടിടം . ജനറൽ ആശുപത്രി വളപ്പിൽ പ്രവർത്തിക്കുന്ന ജില്ലാ ടി.ബി കേന്ദ്രമാണ് ഭീതിയിൽ പ്രവർത്തിക്കുന്നത്. കേന്ദ്രത്തിന്റെ കെട്ടിടം പൊളിച്ചു മാറ്റിയത് ഒരു വർഷം മുമ്പാണ്. അതിനു ശേഷം കേന്ദ്രം പ്രവർത്തിക്കുന്നത് ഉപയോഗയോഗ്യമല്ലെന്ന് അധികൃതർ തന്നെ ബോർഡ് വച്ച് പ്രഖ്യാപിച്ച കെട്ടിടത്തിലാണ് . കോൺക്രീറ്റ് മേൽക്കൂര പൂർണ്ണമായും പ്ലാസ്റ്റിക് ഷീറ്റിട്ട് മറച്ച നിലയിലാണ്. ഔട്ട് പേഷ്യന്റ് വിഭാഗം, സാമ്പിൾ കലക്ഷൻ സെന്റർ എന്നിവ ഈ കെട്ടിടത്തിലാണ് പ്രവർത്തിക്കുന്നത്.
