കാസര്‍കോട്: അഡൂരില്‍ സ്വകാര്യ വ്യക്തിയുടെ പറമ്പില്‍ വനം വകുപ്പ് റിസര്‍വ്വ് ചെയ്ത് വച്ചിരുന്ന കൂറ്റന്‍ വീട്ടിമരം മുറിച്ചു കടത്തി. അഡൂര്‍ വില്ലേജ് ഓഫീസര്‍ കെ നീലകണ്ഠന്‍ നല്‍കിയ പരാതിയില്‍ ആദൂര്‍ പൊലീസ് കേസെടുത്ത് അന്വേഷണം തുടങ്ങി. അഡൂര്‍, പയറടുക്കയിലെ കൃഷ്ണനായികിന്റെ ഉടമസ്ഥതയിലുള്ള സ്ഥലത്തു നിന്നാണ് മരം മുറിച്ചത്. 3.10 മീറ്റര്‍ ചുറ്റളവും ഒന്‍പതു മീറ്റര്‍ ഉയരം ഉള്ളതുമായ വര്‍ഷങ്ങള്‍ പഴക്കമുള്ള വീട്ടിമരമാണ് മുറിച്ചു കടത്തിയത്. ലക്ഷങ്ങള്‍ വിലമതിക്കുന്ന മരമാണ് മോഷ്ടിച്ചു കടത്തിയതെന്നു പറയുന്നു.