കൊച്ചി: നടി ഹണിറോസിന്റെ ഫേസ്ബുക്ക് പോസ്റ്റിനു താഴെ സ്ത്രീ വിരുദ്ധ കമന്റിട്ട സംഭവത്തില്‍ 30 പേര്‍ക്കെതിരെ പൊലീസ് കേസെടുത്തു. എറണാകുളം, പനങ്ങാട് സ്വദേശി ഷാജിയെ കൊച്ചി പൊലീസ് അറസ്റ്റു ചെയ്തു. ഹണി റോസിന്റെ പരാതിയില്‍ സ്ത്രീത്വത്തെ അപമാനിച്ചതിന് ജാമ്യമില്ലാ വകുപ്പ് പ്രകാരം കേസെടുത്താണ് അറസ്റ്റു ചെയ്തത്. സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തിലാണ് കമന്റിട്ട ഫോണിന്റെ ഉടമയായ ഷാജിയെ കണ്ടെത്തിയത്.
”ഒരു വ്യക്തി ദ്വയാര്‍ത്ഥ പ്രയോഗങ്ങളിലൂടെ മനഃപൂര്‍വ്വം തുടര്‍ച്ചയായി പിന്നാലെ നടന്ന് അപമാനിക്കുകയാണെന്നാണ്” ഹണി റോസ് എഫ്.ബി പോസ്റ്റില്‍ പറഞ്ഞിരുന്നത്. ‘ ഈ വ്യക്തി ചടങ്ങുകള്‍ക്കു തന്നെ ക്ഷണിച്ചപ്പോള്‍ പോകാന്‍ വിസമ്മതം പ്രകടിപ്പിച്ചതിന് പ്രതികാരമെന്നോണം താന്‍ പോകുന്ന ചടങ്ങുകളില്‍ മനഃപൂര്‍വ്വം എത്തുകയും സ്ത്രീത്വത്തെ അപമാനിക്കുന്ന രീതിയില്‍ തന്റെ പേര് മാധ്യമങ്ങളിലൂടെ പറയുകയും ചെയ്യുന്നുണ്ടെന്നാണ്’ ഹണി റോസിന്റെ പോസ്റ്റില്‍ പറയുന്നത്. ഈ പോസ്റ്റിനു താഴെയാണ് അപമാനകരമായ കമന്റുകള്‍ വരുന്നത്. ഇതു മനസ്സിലായ ഉടനെയാണ് ഹണിറോസ് പൊലീസില്‍ പരാതി നല്‍കിയത്.