കാസര്‍കോട്: രാത്രി ഭക്ഷണം കഴിച്ചതിനു ശേഷം ഭര്‍ത്താവിനൊപ്പം ഉറങ്ങാന്‍ കിടന്ന യുവതിയെ കിണറ്റില്‍ മരിച്ച നിലയില്‍ കണ്ടെത്തി. പിലിക്കോട്, വറക്കോട് വയലിലെ എ.വി വിനോദിന്റെ ഭാര്യ സുനിത (40)യാണ് മരിച്ചത്. കുമ്പള, അനന്തപുരം സ്വദേശിനിയാണ്. ഞായറാഴ്ച രാത്രി ഭക്ഷണം കഴിച്ച് ഉറങ്ങാന്‍ കിടന്നതായിരുന്നു സുനിത. തിങ്കളാഴ്ച പുലര്‍ച്ചെ അഞ്ചു മണിയോടെ കിടപ്പുമുറിയില്‍ കാണാത്തതിനെ തുടര്‍ന്ന് തെരച്ചില്‍ നടത്തുന്നതിനിടയിലാണ് മൃതദേഹം കിണറ്റില്‍ പൊങ്ങിക്കിടക്കുന്ന നിലയില്‍ കണ്ടത്. വിവരമറിഞ്ഞ് തൃക്കരിപ്പൂരില്‍ നിന്നു എത്തിയ ഫയര്‍ഫോഴ്‌സ് മൃതദേഹം പുറത്തെടുത്ത് പോസ്റ്റുമോര്‍ട്ടത്തിനായി പരിയാരം മെഡിക്കല്‍ കോളേജ് ആശുപത്രി മോര്‍ച്ചറിയിലേക്ക് മാറ്റി. വൈകുന്നേരം അഞ്ചു മണിയോടെ മൃതദേഹം വീട്ടിലെത്തിക്കുമെന്ന് ബന്ധുക്കള്‍ പറഞ്ഞു.
