കണ്ണൂര്‍: പയ്യന്നൂര്‍, പാലക്കോട്, വലിയ കടപ്പുറം അഴിമുഖത്ത് മണല്‍ത്തിട്ടയില്‍ തോണി തട്ടി മറിഞ്ഞുണ്ടായ അപകടത്തില്‍ മത്സ്യത്തൊഴിലാളി മരിച്ചു. വലിയ കടപ്പുറത്തെ കെ.എ നാസര്‍ (52) ആണ് മരിച്ചത്. ശനിയാഴ്ച രാവിലെ 6.30 മണിയോടെയാണ് സംഭവം. ഒറീസ സ്വദേശികളായ രണ്ടു മത്സ്യത്തൊഴിലാളിക്കൊപ്പം പാലക്കോട് ഫിഷ് ലാന്റിംഗ് സെന്ററില്‍ നിന്നു പാലക്കോട് പുഴയിലൂടെ അഴിമുഖം വഴി കടലിലേയ്ക്ക് പോകുന്നതിനിടയിലായിരുന്നു അപകടം.
മത്സ്യബന്ധനത്തിനു പോകുന്ന തോണികള്‍ സ്ഥിരമായി അപകടത്തില്‍പ്പെടുന്ന സ്ഥലത്തുണ്ടായ അപകടത്തിലാണ് നാസറിനും ജീവന്‍ നഷ്ടമായത്. ഇതിനു മുമ്പും നിരവധി തൊഴിലാളികള്‍ സമാന രീതിയില്‍ ഇവിടെ ഉണ്ടായ അപകടത്തില്‍ മരിച്ചിട്ടുണ്ടെന്നു മത്സ്യത്തൊഴിലാളികള്‍ പറഞ്ഞു. പ്രശ്ന പരിഹാരത്തിനായി പുലിമുട്ട് നിര്‍മ്മാണം ആരംഭിച്ചുവെങ്കിലും എങ്ങും എത്താത്ത നിലയിലാണ്.