ഭോപ്പാല്‍: ജയിലില്‍ നിന്ന് അച്ചടി വിദ്യ പരിശീലിച്ചയാള്‍ ജയിലില്‍ നിന്നിറങ്ങി ആ വിദ്യ ഉപയോഗിച്ചു കള്ളനോട്ടടിച്ചു. മാത്രമല്ല. അതു വ്യാപകമായി വിതരണവും ചെയ്തു.
മധ്യപ്രദേശ് വിഭിഷ സ്വദേശി ഭൂപേന്ദ്ര സിംഗ് ധാക്കത്ത് (35) എന്നയാളാണ് ജയിലില്‍ നിന്നു പഠിച്ച അച്ചടി വിദ്യ രാജ്യദ്രോഹക്കുറ്റത്തിനു പ്രയോഗിച്ചത്. കലപാതകമുള്‍പ്പെടെ 11 ക്രിമിനല്‍ കേസുകളില്‍ പ്രതിയായാണ് ധാക്കത്ത് ജയിലിലായത്. തടവു ശിക്ഷക്കിടയില്‍ നല്ല മനുഷ്യനാകാന്‍ ജയിലധികൃതരോടു ധാക്കത്ത് അവസരം തേടി. ഇനിയുള്ള കാലം അധ്വാനിച്ച് ആര്‍ക്കും ശല്യമുണ്ടാക്കാതെ ജീവിക്കുന്നതിനു പറ്റിയ തൊഴിലെന്ന നിലയ്ക്ക് അച്ചടി വിദ്യ ജയിലില്‍ നിന്നു പഠിച്ചു. ആ വിദ്യ ജയില്‍ മോചിതനായ ശേഷം രാജ്യദ്രോഹത്തിനു പ്രയോഗിക്കുകയായിരുന്നു.
200 രൂപയുടെ 95 വ്യാജ കറന്‍സികളുമായാണ് ഇയാള്‍ പിടിയിലായത്. ഇയാളുടെ വീട്ടില്‍ നിന്നു കളര്‍ പ്രിന്റര്‍, ആറു മഷിക്കുപ്പികള്‍, കള്ളനോട്ടടിക്കാന്‍ ഉപയോഗിക്കുന്ന പേപ്പര്‍ എന്നിവയും പിടിച്ചെടുത്തതായി പൊലീസ് അറിയിച്ചു.
കുറേ നാളായി താന്‍ കള്ളനോട്ടടിച്ചു വിതരണം ചെയ്യുന്നുണ്ടെന്ന് ഇയാള്‍ പൊലീസിനോടു സമ്മതിച്ചു. 2003ല്‍ ഇയാളെ മധ്യപ്രദേശിലെ നാലു ജില്ലകളില്‍ നിന്ന് ഒരു വര്‍ഷത്തേക്കു പുറത്താക്കിയിരുന്നു.
