മോഷണ വാര്‍ത്ത കണ്ട് അലിവ് തോന്നിയ കള്ളന്‍ ഉടമക്ക് ബൈക്ക് തിരികെ നല്‍കി. പാലക്കാട് കിഴക്കഞ്ചേരി സ്വദേശി സതീശന്റെ ബൈക്കാണ് കണ്‍മുന്നില്‍ നിന്ന് മോഷ്ടിച്ചത്. കഴിഞ്ഞ ഞായറാഴ്ചയാണ് മോഷണം നടന്നത്. പന്നിയങ്കരയിലുള്ള സുഹൃത്തിന്റെ വീട്ടില്‍ പോയപ്പോള്‍, അവിടെ വച്ച് സുഹൃത്തുമായി സംസാരിച്ചു തിരിഞ്ഞു നോക്കുമ്പോള്‍ തന്റെ ബൈക്കുമായി ഒരാള്‍ കടന്നുകളയുന്നതാണ് കണ്ടത്. സതീശനും സുഹൃത്തും പിന്തുടര്‍ന്ന് ഓടിയെങ്കിലും കള്ളനെ കിട്ടിയില്ല. തുടര്‍ന്ന് വടക്കാഞ്ചേരി പൊലീസില്‍ പരാതി നല്‍കുകയായിരുന്നു. മോഷണം പോയ സംഭവം വാര്‍ത്തയായതോടെ അടുത്ത ദിവസം കള്ളന്‍ സതീശനെ വിളിക്കുകയായിരുന്നു. വാര്‍ത്ത കണ്ടെന്നും ബൈക്ക് തിരികെ തരാമെന്നും സതീശിനെ മോഷ്ടാവ് ഫോണില്‍ വിളിച്ച് അറിയിച്ചു. താന്‍ വാര്‍ത്ത കണ്ടെന്നും മാനസിക വിഭ്രാന്തി കൊണ്ടാണ് ഇങ്ങനെ സംഭവിച്ചതെന്നും കേസാക്കരുതെന്നും കള്ളന്‍ പറഞ്ഞു. ബൈക്ക് തിരികെ നല്‍കാമെന്നും അറിയിച്ചു. ബൈക്കില്‍ സൂക്ഷിച്ചിരുന്ന ഡയറിയില്‍ നിന്നാണ് മോഷ്ടാവിന് സതീശന്റെ നമ്പര്‍ ലഭിക്കുന്നത്
മണിക്കൂറുകള്‍ക്ക് ശേഷം ദേശീയപാതയോരത്ത് വാഹനം ഉപേക്ഷിച്ച നിലയില്‍ കണ്ടെത്തുകയായിരുന്നു. അതേസമയം മോഷ്ടാവിനെ പിടികൂടാന്‍ സാധിച്ചില്ല.