കാസര്കോട്: പെരിയ മൂന്നാം കടവ് റോഡിന്റെ അരികില് പുല്ലും കുറ്റിക്കാടും വളര്ന്ന് യാത്രക്കാര്ക്ക് ദുരിതമാകുന്നു. നിലവില് കാല്നടയാത്രക്കാര്ക്ക് നടക്കാന്പോലും ഇടമില്ലാത്ത സ്ഥിതിയാണ്. പുല്ലൂര് പെരിയ പഞ്ചായത്തിലെ പുളിക്കലില് റോഡില് വാഹനങ്ങള്ക്ക് പോകാനുള്ള വെള്ള അടയാളം ഈ കുറ്റിക്കാടിനകത്താണുള്ളത്. ആറുബസുകള് സര്വീസ് നടത്തുന്ന ഈ പാതയിലൂടെ ടിപ്പര് ലോറികള് അടക്കമുള്ള വാഹനങ്ങള് ചീറിപ്പായുകയാണ്. പ്രദേശത്തെ അംഗനവാടി കുട്ടികളും രക്ഷിതാക്കളും ഭയപ്പാടോടുകൂടിയാണ് ഇത് വഴി കടന്നു പോകുന്നത്. രണ്ടുഭാഗത്തുനിന്നും വാഹനമെത്തിയാല് കാട് കയറുകയേ രക്ഷയുള്ളൂവെന്ന് നാട്ടുകാര് പറയുന്നു. രണ്ടുമൂന്നു അപകടങ്ങള് ഈവര്ഷം ഈ മേഖലയിലുണ്ടായിട്ടുണ്ട്. റോഡിന്റെ അരികിലെ പുല്ലും കുറ്റിക്കാടും കടന്നാല് വലിയ കള്വേര്ട്ടുമുണ്ട്. ഇത് വാഹനയാത്രക്കാരുടെ ശ്രദ്ധയില്പെടാറില്ല. കള്വേര്ട്ടില് വാഹനങ്ങളും വീണ് അപകടമുണ്ടായതായും പറയുന്നു. നാട്ടുകാര് നിരവധി തവണ പഞ്ചായത്തിനെ സമീപിച്ചിട്ടും രക്ഷയില്ല. വലിയ അപകടം വന്നാല് മാത്രമേ അധികൃതരുടെ കണ്ണുതുറക്കൂവെന്നാണ് ചിലര് പറയുന്നത്.