തിരുവനന്തപുരം:ഏപ്രിൽ മാസത്തിൽ കേരളം ഉൾപ്പെടെ രാജ്യത്തിന്റെ ഭൂരിഭാഗം പ്രദേശങ്ങളിലും സാധാരണ നിലയേക്കാൾ കൂടുതൽ മഴ ലഭിക്കുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. വടക്കുകിഴക്കൻ ഇന്ത്യ ഒഴികെ മറ്റു മിക്ക സംസ്ഥാനങ്ങളിലും ഇതേ സ്ഥിതി പ്രതീക്ഷിക്കുന്നു. എന്നാൽ വടക്കുകിഴക്കൻ മേഖലകളിൽ മഴ സാധാരണ നിലയേക്കാൾ കുറവായിരിക്കുമെന്നും വകുപ്പ് വ്യക്തമാക്കി.താപനിലയുടെ കാര്യത്തിൽ, രാജ്യത്തിന്റെ പല ഭാഗങ്ങളിലും ഏപ്രിലിൽ പരമാവധി താപനില സാധാരണ നിലയിൽ അല്ലെങ്കിൽ അതിൽ താഴെ നിലനിൽക്കും. എന്നാൽ കിഴക്കൻ, വടക്കുകിഴക്കൻ, വടക്കുപടിഞ്ഞാറൻ ഇന്ത്യയുടെ ചില ഭാഗങ്ങളിൽ സാധാരണത്തേക്കാൾ ഉയർന്ന താപനില അനുഭവപ്പെടാം.ഒഡീഷ, പശ്ചിമ ബംഗാൾ, തമിഴ്‌നാട്, പുതുച്ചേരി എന്നിവിടങ്ങളിലെ തീരദേശ മേഖലകളിലും ഗുജറാത്ത്, മഹാരാഷ്ട്ര, കർണാടക എന്നിവിടങ്ങളിലെ ഒറ്റപ്പെട്ട പ്രദേശങ്ങളിലും ഉഷ്ണതരംഗ സാധ്യത ഏറെ ഉയർന്നതാണെന്ന് കാലാവസ്ഥ വകുപ്പ് മുന്നറിയിപ്പ് നൽകി.നിലവിൽ ഇക്വട്ടോറിയൽ പസഫിക് സമുദ്രത്തിൽ ന്യൂട്രൽ എൽ നിനോ-സതേൺ ഓസിലേഷൻ സാഹചര്യമാണ് നിലനിൽക്കുന്നത്. ഏപ്രിൽ മുതൽ ജൂൺ വരെ ഈ അവസ്ഥ തുടരുമെന്ന് മൺസൂൺ മിഷൻ ക്ലൈമറ്റ് ഫോർകാസ്റ്റ് സിസ്റ്റം സൂചിപ്പിക്കുന്നു. തുടർന്ന് എൽ നിനോ സാഹചര്യങ്ങൾ രൂപപ്പെടാനുള്ള സാധ്യത ഘട്ടംഘട്ടമായി വർധിക്കുമെന്നും കാലാവസ്ഥ വകുപ്പ് വ്യക്തമാക്കി.