തിരുവനന്തപുരം: സംസ്ഥാനത്ത് അള്ട്രാവയലറ്റ് വികിരണതോത് ഉയരുന്ന സാഹചര്യത്തില് വിവിധ ജില്ലകളില് ദുരന്തനിവാരണ അതോറിറ്റി മുന്നറിയിപ്പ് പുറപ്പെടുവിച്ചു. കൊട്ടാരക്കര, കോന്നി, ചെങ്ങന്നൂര്, ചങ്ങനാശ്ശേരി, മൂന്നാര് എന്നിവിടങ്ങളില് ഓറഞ്ച് അലേര്ട്ട് പ്രഖ്യാപിച്ചു. ഈ പ്രദേശങ്ങളിലെ ജനങ്ങളോട് മുന്കരുതലുകള് സ്വീകരിക്കണമെന്ന് അധികൃതര് അറിയിച്ചു.
അതേസമയം കളമേശരി, ഒല്ലൂര്, തൃത്താല, പൊന്നാനി, മാനന്തവാടി എന്നിവിടങ്ങളില് യെല്ലോ അലേര്ട്ട് പ്രഖ്യാപിച്ചിട്ടുണ്ട്. തുടര്ച്ചയായി കൂടുതല് സമയം അള്ട്രാവയലറ്റ് രശ്മികള് ശരീരത്തില് പതിക്കുന്നത് സൂര്യാതാപം, ത്വക്ക് രോഗങ്ങള്, നേത്രരോഗങ്ങള് തുടങ്ങിയവയ്ക്ക് കാരണമാകാമെന്നും മുന്നറിയിപ്പുണ്ട്.
പുറം ജോലികളില് ഏര്പ്പെടുന്നവര്, മല്സ്യത്തൊഴിലാളികള്, ബൈക്ക് യാത്രക്കാര്, വിനോദസഞ്ചാരികള് എന്നിവര് പ്രത്യേക ജാഗ്രത പാലിക്കണം. പുറത്തേക്ക് പോകുമ്പോള് തൊപ്പി, കുട, സണ്ഗ്ലാസ് എന്നിവ ഉപയോഗിക്കുക. ശരീരം മുഴുവന് മറയുന്ന കോട്ടണ് വസ്ത്രങ്ങള് ധരിക്കുന്നത് നല്ലതാണ്. യാത്രക്കിടെ തണലില് വിശ്രമിക്കാന് ശ്രമിക്കുക. കുന്നിന് പുറങ്ങളില് താമസിക്കുന്നവര് പ്രത്യേക ശ്രദ്ധ പുലര്ത്തണമെന്ന് അധികൃതര് അറിയിച്ചു.
