ഇറാനും അമേരിക്കയും തമ്മിലുള്ള യുദ്ധം14ാം ദിവസത്തേക്കു കടന്നു. ഇറാന്റെ പുതിയ പരമോന്നത നേതാവ് മുജ്തബ ഖമനയിയെ കുറിച്ച് വിവരം നൽകുന്നവർക്ക് അമേരിക്ക 10 ദശലക്ഷം ഡോളർ (ഏകദേശം 92 കോടി രൂപ) പാരിതോഷികം പ്രഖ്യാപിച്ചു. മുജ്തബ ഖമനയിക്ക് പരിക്കേറ്റതായും റിപ്പോർട്ടുകളുണ്ട്.
അമേരിക്കൻ വിമാനം തകർന്നു: ഇറാഖിൽ അമേരിക്കയുടെ ഇന്ധനം നിറയ്ക്കുന്ന വിമാനം തകർന്ന് വീണ് 6 സൈനികർ കൊല്ലപ്പെട്ടു.
മിസൈൽ ആക്രമണങ്ങൾ: ഇസ്രായേൽ നഗരമായ സർസീറിൽ ഇറാൻ നടത്തിയ മിസൈൽ ആക്രമണത്തിൽ 60 പേർക്ക് പരിക്കേറ്റു. അതേസമയം, ലെബനനിൽ ഇസ്രായേൽ ലിറ്റാനി നദിക്ക് കുറുകെയുള്ള പാലം തകർത്തു.
ഇന്ത്യയ്ക്കു
പാചകവാതക ആശ്വാസം: ഹോർമുസ് കടലിടുക്ക് വഴി ഇന്ത്യൻ കപ്പലുകൾക്ക് സുരക്ഷിതമായി കടന്നുപോകാൻ ഇറാൻ അനുമതി നൽകി. 40,000 മെട്രിക് ടൺ എൽപിജിയുമായി ‘ശിവാലിക്’ എന്ന കപ്പൽ ഇന്ത്യയിലേക്ക് പുറപ്പെട്ടു. കഴിഞ്ഞ ദിവസങ്ങളിൽ ഇന്ത്യയിൽ അനുഭവപ്പെട്ട പാചകവാതക ക്ഷാമത്തിന് ഇത് വലിയ ആശ്വാസമാകും.
ഒമാനിൽ ആക്രമണം: ഒമാനിലെ ഇൻഡസ്ട്രിയൽ ഹബിലുണ്ടായ ഡ്രോൺ ആക്രമണത്തിൽ രണ്ട് ഇന്ത്യക്കാർ കൊല്ലപ്പെട്ടു, 10 പേർക്ക് പരിക്കേറ്റു.
ഇന്ധനവില: അന്താരാഷ്ട്ര വിപണിയിൽ എണ്ണവില ബാരലിന് 100 ഡോളറിന് മുകളിൽ തുടരുന്നു. ഇതേത്തുടർന്ന് ഇൻഡിഗോ എയർലൈൻസ് ഉൾപ്പെടെയുള്ളവർ ഇന്ധന സർചാർജ് ഏർപ്പെടുത്തി, ഇത് വിമാനടിക്കറ്റ് നിരക്ക് വർദ്ധിപ്പിക്കാൻ കാരണമായി.
വടക്കുപടിഞ്ഞാറൻ പാകിസ്ഥാനിലുണ്ടായ ഐഇഡി സ്ഫോടനത്തിൽ 7 പേർ കൊല്ലപ്പെട്ടു.
ഇസ്ലാമാബാദിന് സമീപം രണ്ട് സ്ഫോടകവസ്തുക്കൾ നിറച്ച ഡ്രോണുകൾ സൈന്യം വെടിവെച്ചിട്ടു.
ചിന്തകൾ കൊണ്ട് കമ്പ്യൂട്ടറുകളെ നിയന്ത്രിക്കാൻ സഹായിക്കുന്ന ‘ബ്രെയിൻ-കമ്പ്യൂട്ടർ ഇന്റർഫേസ്’ ഉൽപ്പന്നത്തിന് ചൈന വാണിജ്യാനുമതി നൽകി.
കന്യാകുമാരി തീരത്ത് ‘കള്ളക്കടൽ’ പ്രതിഭാസം ഉണ്ടാകാൻ സാധ്യതയുള്ളതിനാൽ കേരള തീരത്തും ജാഗ്രത നിർദ്ദേശം നൽകിയിട്ടുണ്ട്.
ഒമാനിലെ ഡ്രോൺ ആക്രമണം: ഒമാനിലെ സോഹാർ സിറ്റിയിലുണ്ടായ ഡ്രോൺ ആക്രമണത്തിൽ രണ്ട് ഇന്ത്യൻ പൗരന്മാർ കൊല്ലപ്പെട്ടു. പത്ത് ഇന്ത്യക്കാർക്ക് പരിക്കേറ്റതായും വിദേശകാര്യ മന്ത്രാലയം സ്ഥിരീകരിച്ചു.
എയർ ഇന്ത്യയും ഇൻഡിഗോയും നിരക്ക് വർദ്ധിപ്പിച്ചു: ഇന്ധന വിലവർദ്ധനവ് കണക്കിലെടുത്ത് വിമാന ടിക്കറ്റുകൾക്ക് മേൽ എയർ ഇന്ത്യക്ക് പിന്നാലെ ഇൻഡിഗോയും സർചാർജ് ഏർപ്പെടുത്തി. ഇതോടെ ആകാശയാത്രയ്ക്ക് ചെലവേറും.
കേന്ദ്ര സർക്കാർ ജീവനക്കാർക്ക് ആശ്വാസം: കേന്ദ്ര സർക്കാർ ജീവനക്കാർക്കും പെൻഷൻകാർക്കും ജനുവരി മുതൽ മാർച്ച് വരെയുള്ള കാലയളവിലെ ബമ്പർ ഡിഎ കുടിശ്ശിക ലഭിക്കുമെന്ന് റിപ്പോർട്ടുകൾ സൂചിപ്പിക്കുന്നു.
ഹിമാചൽ കേഡർ ഐപിഎസ് ഓഫീസർ രാകേഷ് അഗർവാളിനെ എൻഐഎ യുടെ പുതിയ ഡയറക്ടർ ജനറലായി നിയമിച്ചു.
സ്വർണ്ണവില: ആഗോള വിപണിയിലെ മാറ്റങ്ങളെത്തുടർന്ന് ഇന്ത്യയിൽ സ്വർണ്ണവില തുടർച്ചയായ നാലാം ദിവസവും കുറഞ്ഞു.
കാലാവസ്ഥാ മുന്നറിയിപ്പ്: കന്യാകുമാരി തീരത്ത് ‘കള്ളക്കടൽ’ പ്രതിഭാസത്തിന് സാധ്യതയുള്ളതിനാൽ മാർച്ച് 16 വരെ കടലാക്രമണ ജാഗ്രത പാലിക്കാൻ നിർദ്ദേശമുണ്ട്.
ഉത്തരേന്ത്യയിൽ പലയിടത്തും മഴയ്ക്കും ആലിപ്പഴ വർഷത്തിനും സാധ്യതയുണ്ട്.
കേരള
പുതിയ സിനിമാ നയം: സിനിമാ മേഖലയിലെ തൊഴിൽ സുരക്ഷയും സ്ത്രീ സുരക്ഷയും ലക്ഷ്യമിട്ടുള്ള സംസ്ഥാന സർക്കാരിന്റെ പുതിയ ‘സിനിമാ നയം’ മന്ത്രിസഭ അംഗീകരിച്ചു. 92 ശുപാർശകളാണ് ഈ നയത്തിലുള്ളത്.
വന്യജീവി ആക്രമണത്തിൽ കൊല്ലപ്പെടുന്നവരുടെ കുടുംബത്തിനുള്ള ധനസഹായം 10 ലക്ഷത്തിൽ നിന്ന് 14 ലക്ഷം രൂപയായി വർദ്ധിപ്പിച്ചു. പാമ്പ്, കടന്നൽ എന്നിവയുടെ കുത്തേറ്റ് മരിക്കുന്നവർക്കുള്ള സഹായം 4 ലക്ഷത്തിൽ നിന്ന് 10 ലക്ഷമായും ഉയർത്തി.
വയനാട് തുരങ്കപാതയുടെ ആനക്കാംപൊയിൽ-മേപ്പാടി-കള്ളാടി തുരങ്കപാതയ്ക്കെതിരെയുള്ള ഹർജിയിൽ തങ്ങളുടെ ഭാഗം കേൾക്കാതെ വിധി പറയരുതെന്ന് ആവശ്യപ്പെട്ട് സംസ്ഥാന സർക്കാർ സുപ്രീം കോടതിയിൽ തടസ്സഹർജി നൽകി.
സെക്രട്ടേറിയറ്റിൽ സുരക്ഷാ വീഴ്ച: ഗൂഗിൾ മാപ്പ് നോക്കി വന്ന കാർ തിരുവനന്തപുരം സെക്രട്ടേറിയറ്റിനുള്ളിലേക്ക് ഓടിച്ചു കയറ്റാൻ ശ്രമിച്ച മൂന്ന് യുവാക്കളെ പോലീസ് കസ്റ്റഡിയിലെടുത്തു.
ചെങ്ങന്നൂരിനും മാവേലിക്കരയ്ക്കും ഇടയിലുള്ള റെയിൽവേ പാലത്തിന്റെ അറ്റകുറ്റപ്പണി പ്രമാണിച്ച് ഇന്ന് (മാർച്ച് 14) കൊല്ലം-എറണാകുളം മെമു റദ്ദാക്കി. മറ്റ് ചില ട്രെയിനുകൾ വഴിതിരിച്ചുവിടും.
ഉയർന്ന താപനില: സംസ്ഥാനത്ത് ചൂട് കഠിനമായി തുടരുന്നു. 8 ജില്ലകളിൽ ഉയർന്ന താപനില മുന്നറിയിപ്പ് നൽകിയിട്ടുണ്ട്. കണ്ണൂർ, കാസർകോട് ജില്ലകളിൽ താപനില 37°C വരെ ഉയർന്നേക്കാം.
കെ.എസ്.ആർ.ടി.സി: ജീവനക്കാർക്കും പെൻഷൻകാർക്കും രണ്ടു ഗഡു ഡി.എ നൽകാൻ തീരുമാനമായി.
ഐ.എഫ്.എൽ ഇന്ത്യൻ ഫുട്ബോൾ ലീഗിൽ ഇന്ന് ഗോകുലം കേരള എഫ്.സി ശ്രീനിധി ഡെക്കാനുമായി ഏറ്റുമുട്ടും.
കേരളത്തിലെ ട്രെയിൻ യാത്രക്കാർക്ക് വലിയ ആശ്വാസം പകരുന്ന വാർത്തയാണ് കേന്ദ്ര റെയിൽവേ മന്ത്രാലയത്തിൽ നിന്ന് പുറത്തുവന്നിരിക്കുന്നത്. ഇതുവരെ ‘സ്പെഷ്യൽ’ സർവീസുകളായി ഓടിക്കൊണ്ടിരുന്ന അഞ്ച് ട്രെയിനുകൾ മാർച്ച് 16 മുതൽ സ്ഥിരപ്പെടുത്തിക്കൊണ്ട് ഉത്തരവായിട്ടുണ്ട്.
സ്ഥിരപ്പെടുത്തുന്ന പ്രധാന ട്രെയിനുകൾ :
1. തിരുവനന്തപുരം നോർത്ത് (കൊച്ചുവേളി) – മംഗളൂരു ജങ്ഷൻ അന്ത്യോദയ എക്സ്പ്രസ് (16313/14)
മാർച്ച് 16 മുതൽ തിരുവനന്തപുരത്ത് നിന്നും മാർച്ച് 17 മുതൽ മംഗളൂരുവിൽ നിന്നും സ്ഥിര സർവീസായി ഓടും.
പ്രത്യേകത: പൂർണ്ണമായും അൺറിസർവ്ഡ് കോച്ചുകളുള്ള സൂപ്പർഫാസ്റ്റ് ട്രെയിനാണിത്.
2. പാലക്കാട് – കണ്ണൂർ എക്സ്പ്രസ് (16611)
മാർച്ച് 16 മുതൽ പ്രതിദിന സർവീസായി മാറും.
സ്റ്റോപ്പുകൾ: ഒറ്റപ്പാലം, ഷൊർണൂർ, കുറ്റിപ്പുറം, തിരൂർ, പരപ്പനങ്ങാടി, ഫറോക്ക്, കോഴിക്കോട്, വടകര, തലശ്ശേരി തുടങ്ങിയ സ്റ്റേഷനുകളിൽ സ്റ്റോപ്പുണ്ടാകും.
3. മംഗളൂരു സെൻട്രൽ – കോഴിക്കോട് എക്സ്പ്രസ് (16610)
ട്രെയിൻ മാർച്ച് 16 മുതൽ പാലക്കാട് വരെ നീട്ടി സ്ഥിര സർവീസ് ആരംഭിക്കും.
നേട്ടം: മലബാർ മേഖലയിൽ നിന്നും പാലക്കാട് ഭാഗത്തേക്ക് പോകുന്നവർക്ക് ഇത് ഏറെ പ്രയോജനപ്പെടും.
4. കൊല്ലം – കോട്ടയം – എറണാകുളം മെമു (66328/27)
സമയം: മാർച്ച് 16 മുതൽ ആഴ്ചയിൽ അഞ്ച് ദിവസം (ശനി, ഞായർ ഒഴികെ) സ്ഥിര സർവീസായി ഓടും.
ഗുണഭോക്താക്കൾ: ദിവസേന യാത്ര ചെയ്യുന്ന ഉദ്യോഗസ്ഥർക്കും വിദ്യാർത്ഥികൾക്കും ഇത് വലിയ സഹായമാകും.
പ്രധാനമന്ത്രിയുടെയും കേന്ദ്ര റെയിൽവേ മന്ത്രിയുടെയും ഇടപെടലിനെത്തുടർന്നാണ് ഈ തീരുമാനം ഉണ്ടായതെന്ന് കേന്ദ്രമന്ത്രി സുരേഷ് ഗോപി അറിയിച്ചു.
മാർച്ച് മാസം പകുതിയോടെ പണികൾ നടക്കുന്നതിനാൽ ചില ട്രെയിനുകൾക്ക് സമയക്രമീകരണവും നിയന്ത്രണങ്ങളും ഏർപ്പെടുത്തിയിട്ടുണ്ട്. യാത്ര പുറപ്പെടുന്നതിന് മുൻപ് IRCTC ആപ്പ് വഴിയോ റെയിൽവേ വെബ്സൈറ്റ് വഴിയോ സമയം ഉറപ്പുവരുത്തുക.
നിയമസഭാ തിരഞ്ഞെടുപ്പ് തിങ്കളാഴ്ച പ്രഖ്യാപിച്ചേക്കും
തിരുവനന്തപുരം: നിയമസഭാ തിരഞ്ഞെടുപ്പ് ഉടൻ പ്രഖ്യാപിച്ചേക്കും. പ്രഖ്യാപനം തിങ്കളാഴ്ച ഉണ്ടാകുമെന്നാണ് പ്രതീക്ഷ. ഏപ്രിൽ 25നും മെയ് 10നും ഇടയിൽ ഒറ്റ ഘട്ട മായായിരിക്കും തിരഞ്ഞെടുപ്പ് . കേരളത്തിനു പുറമേ തിരഞ്ഞെടുപ്പ് നടക്കുന്ന ബംഗാളിലെ അന്തിമ വോട്ടർപട്ടികയിൽ പരാതി നൽകാനുള്ള അവസാന ദിവസം നാളെയാണ്. തമിഴ്നാട്, പുതുച്ചേരി, അസം സംസ്ഥാനങ്ങളിലും കേരള തിരഞ്ഞെടുപ്പിനൊപ്പമായിരിക്കും വോട്ടെടുപ്പ് നടക്കുക യെന്നും പ്രതീക്ഷിക്കുന്നു.
മന്ത്രി ഗണേഷ് കുമാർ പ്രസിഡണ്ടായ എൻഎസ്എസ് പത്തനാപുരം യൂണിയൻ പിരിച്ചുവിട്ടു
