മലപ്പുറം: വീട്ടിലെ ഫ്രിഡ്ജില് സൂക്ഷിച്ചിരുന്ന ഭക്ഷണം കഴിച്ചതിന് പിന്നാലെ ഏഴു വയസ്സുകാരി കുഴഞ്ഞുവീണ് മരിച്ചു. കുറ്റിപ്പുറം എടച്ചലം കരിമ്പനക്കല് ഹക്കീമിന്റെ മകള് ലസ്നയാണ് മരിച്ചത്. കുടുംബത്തിലെ മറ്റുള്ളവര് അവശനിലയില് ആശുപത്രിയില് കഴിയുകയാണ്. ഭക്ഷ്യവിഷബാധയേറ്റതായി സംശയിക്കുന്നുവെന്ന് ആശുപത്രി വൃത്തങ്ങള് അറിയിച്ചു. ലസ്നയ്ക്കൊപ്പം മാതാവ് ഷഹല, സഹോദരി മിന്സ, ഹക്കീമിന്റെ മാതാപിതാക്കള്, സഹോദരി എന്നിവരെയാണ് കടുത്ത വയറിളക്കവും ഛര്ദ്ദിയും അനുഭവപ്പെട്ടതിനെ തുടര്ന്ന് ആശുപത്രിയില് പ്രവേശിപ്പിച്ചത്.
ഗര്ഭിണിയായ ഷഹലയ്ക്കും മറ്റൊരു മകള് മിന്സയ്ക്കും കടുത്ത ക്ഷീണം അനുഭവപ്പെട്ടതിനെ തുടര്ന്ന് ഡ്രിപ്പ് നല്കി ചികിത്സ നല്കുന്നതിനിടെയാണ് ലസ്ന കുഴഞ്ഞുവീണത്. ലസ്നയുടെ മരണത്തിന് പിന്നാലെ കുടുംബത്തിലെ മറ്റ് അംഗങ്ങളെ വിദഗ്ധ ചികിത്സയ്ക്കായി കോട്ടയ്ക്കലിലെ സ്വകാര്യ ആശുപത്രിയിലേക്ക് മാറ്റി.
വീട്ടില് തയ്യാറാക്കി ഫ്രിഡ്ജില് വച്ചിരുന്ന ഭക്ഷണമാണ് കുടുംബം കഴിച്ചത്. ആരോഗ്യ വകുപ്പ് അധികൃതര് വീട്ടിലെത്തി ഭക്ഷണത്തിന്റെ സാമ്പിളുകള് ശേഖരിച്ച് പരിശോധനയ്ക്ക് അയച്ചിട്ടുണ്ട്. പോസ്റ്റ്മോര്ട്ടം റിപ്പോര്ട്ട് ലഭിച്ചാല് മാത്രമേ മരണ കാരണം വ്യക്തമാകുകയുള്ളൂ എന്ന് ആശുപത്രി അധികൃതര് അറിയിച്ചു.
