കാസര്‍കോട്: പൊയ്‌നാച്ചി- ബന്തടുക്ക റോഡിലെ കൊളത്തൂരില്‍ ബൈക്കിടിച്ച് ഗുരുതരമായി പരിക്കേറ്റ് മംഗ്‌ളൂരുവിലെ ആശുപത്രിയില്‍ ചികിത്സയിലായിരുന്ന യുവാവ് മരിച്ചു. കൊളത്തൂരിലെ ചെങ്കല്‍ ക്വാറയിലെ തൊഴിലാളിയായ മേഘാലയ സ്വദേശി യോദിസ്ഥര്‍ റാബ (35)യാണ് മരിച്ചത്. ഞായറാഴ്ച രാത്രി എട്ടുമണിയോടെ ഉണ്ടായ അപകടത്തിലാണ് ഇയാള്‍ക്ക് പരിക്കേറ്റത്. കൂടെ ജോലി ചെയ്യുന്ന നാരായണന്‍ എന്നയാള്‍ക്കൊപ്പം നടന്നു പോവുകയായിരുന്നു റാബ. ഇതിനിടയില്‍ കുണ്ടംകുഴി ഭാഗത്തു നിന്നും പെര്‍ളടുക്കം ഭാഗത്തേയ്ക്ക് പോവുകയായിരുന്ന ബൈക്കിടിച്ച് തെറുപ്പിക്കുകയായിരുന്നു. റോഡിലേയ്ക്ക് തെറിച്ച് വീണു ഗുരുതരമായി പരിക്കേറ്റ് മംഗ്‌ളൂരുവിലെ ആശുപത്രിയില്‍ ചികിത്സയില്‍ കഴിയുന്നതിനിടയില്‍ വ്യാഴാഴ്ച രാത്രിയാണ് മരണം സംഭവിച്ചത്. അപകടത്തില്‍ ബേഡകം പൊലീസ് കേസെടുത്തു.