കാസര്‍കോട്: കിടപ്പുമുറിയിലും കാറിലും സൂക്ഷിച്ചിരുന്ന 11.769 കിലോ കഞ്ചാവുമായി യുവാവ് അറസ്റ്റില്‍. കുബണൂര്‍, കാടമൂല, കുബണൂര്‍ ഹൗസിലെ മെയ്തീന്‍ ഷബീറി(35)നെയാണ് കാസര്‍കോട് എക്‌സൈസ് ആന്റ് ആന്റി നാര്‍ക്കോട്ടിക് സ്‌പെഷ്യല്‍ സ്‌ക്വാഡ് ഇന്‍സ്‌പെക്ടര്‍ വിഷ്ണു പ്രകാശും സംഘവും അറസ്റ്റു ചെയ്തത്. രഹസ്യ വിവരത്തിന്റെ അടിസ്ഥാനത്തില്‍ തിങ്കളാഴ്ച വൈകിട്ട് മൊയ്തീന്‍ ഷബീറിന്റെ കിടപ്പുമുറിയില്‍ നടത്തിയ പരിശോധനയില്‍ 5.269 കിലോ കഞ്ചാവാണ് ആദ്യം പിടികൂടിയത്. കട്ടിലിന് അടിയില്‍ സൂക്ഷിച്ച നിലയിലായിരുന്നു കഞ്ചാവ്. തുടര്‍ന്ന് വീട്ടുമുറ്റത്ത് നിര്‍ത്തിയിട്ടിരുന്ന ഷബീറിന്റെ നാനോ കാറിനുള്ളില്‍ നടത്തിയ പരിശോധനയില്‍ 6.5 കിലോ കഞ്ചാവ് കൂടി കണ്ടെടുത്തുവെന്നു എക്‌സൈസ് അധികൃതര്‍ പറഞ്ഞു. നേരത്തെ കഞ്ചാവ് കേസില്‍ അറസ്റ്റിലായി ജയിലില്‍ കഴിഞ്ഞ ആളാണ് ഷബീറെന്നു കൂട്ടിച്ചേര്‍ത്തു.
എക്‌സൈസ് സംഘത്തില്‍ അസി. എക്‌സൈസ് ഇന്‍സ്‌പെക്ടര്‍മാരായ സി അജീഷ്, കെ.ആര്‍ പ്രജിത്ത്, സിവില്‍ എക്‌സൈസ് ഓഫീസര്‍മാരായ സോനു സെബാസ്റ്റിയന്‍, വി.വി ഷിജിത്ത്, ടി.വി ധന്യ, ഡ്രൈവര്‍ പി.എ ക്രിസ്റ്റിന്‍ എന്നിവരും ഉണ്ടായിരുന്നു.
എസ്.ഐ.ആര്‍ ഡ്യൂട്ടിക്കിടെ ബി.എല്.ഒ കുഴഞ്ഞുവീണു; ആശുപത്രിയില്, സംഭവം കൊന്നക്കാട്
Monday, 17 November 2025, 13:14
