കോട്ടയം: കുമ്മനത്ത് നവജാത ശിശുവിനെ വില്‍ക്കാന്‍ ശ്രമിച്ച സംഭവത്തില്‍ കുഞ്ഞിന്റെ പിതാവിനെയും, ഇടനിലക്കാരനെയും, വാങ്ങാനെത്തിയ ആളെയും പൊലീസ് കസ്റ്റഡിയില്‍ എടുത്തു. രണ്ടര മാസം പ്രായമുള്ള ആണ്‍കുഞ്ഞിനെയാണ് പിതാവ് വില്‍ക്കാന്‍ ശ്രമിച്ചത്. 50,000 രൂപയ്ക്ക് കുഞ്ഞിനെ വില്‍ക്കാനായിരുന്നു ശ്രമം. കുഞ്ഞിന്റെ പിതാവ് അസം സ്വദേശിയാണ്. ഈരാറ്റുപേട്ടയില്‍ താമസിക്കുന്ന ഉത്തര്‍പ്രദേശുകാരനാണ് കുഞ്ഞിനെ വാങ്ങാന്‍ എത്തിയത്. ഞായറാഴ്ചയാണ് കുഞ്ഞിനെ കൈമാറാന്‍ സമയം കണ്ടത്. കുഞ്ഞിന്റെ മാതാവിന് കുഞ്ഞിന് വില്‍ക്കുന്നതില്‍ എതിര്‍പ്പുണ്ടായിരുന്നു. തുടര്‍ന്ന് കൂടെ ജോലിചെയ്യുന്നവരോട് യുവതി വിവരം അറിയിക്കുകയായിരുന്നു. അങ്ങനെയാണ് സംഭവം പൊലീസിനെ അറിയിക്കുന്നത്. ഇതേ തുടര്‍ന്നാണ് പൊലീസെത്തി മൂവരെയും കസ്റ്റഡിയിലെടുത്തത്.