കൊച്ചി: അങ്കമാലിയില് പെണ്കുട്ടിയെ പ്രസവിച്ചതിന്റെ പേരില് യുവതിക്ക് ഭര്ത്താവില് നിന്ന് ക്രൂരമര്ദനം. സംഭവത്തില് ഭര്ത്താവിനെതിരെ പൊലീസ് കേസെടുത്തു. ആദ്യത്തെ കുഞ്ഞ് പെണ്കുട്ടിയായത് ഭാര്യയുടെ കുറ്റം കൊണ്ടാണെന്ന് ആരോപിച്ചായിരുന്നു പീഡനം. നാല് വര്ഷത്തോളം യുവതി ഭര്ത്താവില് നിന്ന് കൊടിയ മര്ദനം അനുഭവിച്ചുവരികയായിരുന്നു. യുവതിയെ ചികിത്സിച്ച ഡോക്ടറാണ് അങ്കമാലി പൊലീസിനെ വിവരമറിയിച്ചത്. മര്ദനത്തിലേറ്റ പരിക്കുകള്ക്ക് യുവതി ചികിത്സ തേടിയപ്പോള് യുവതി നടന്ന സംഭവങ്ങള് ഡോക്ടറോട് പറയുകയായിരുന്നു. അങ്ങനെ ക്രൂരതയുടെ വിവരങ്ങള് പുറത്തായത്. 2020 ലാണ് യുവതിയുടെ വിവാഹം നടന്നത്. 2021 ല് ഇവര്ക്ക് പെണ്കുഞ്ഞ് പിറന്നു. അന്നുമുതല് ഇയാള് യുവതിയെ ഉപദ്രവിച്ച് വരികയായിരുന്നു. പൊലീസ് സംഭവം അന്വേഷിച്ചതോടെ തന്റെ കുഞ്ഞിനേയും ഭര്ത്താവ് മര്ദിച്ചിരുന്നതായി യുവതി വെളിപ്പെടുത്തിയിട്ടുണ്ട്. യുവതിയെ വീട്ടുകാര്ക്ക് മുന്നില് വച്ച് അസഭ്യം പറയുന്നത് പതിവാണെന്നും പൊലീസ് പറയുന്നു. കേസുമായി ബന്ധപ്പെട്ട് പൊലീസ് കൂടുതല് വിവരങ്ങള് ശേഖരിച്ചുവരികയാണ്. അറസ്റ്റിലേക്ക് ഉള്പ്പെടെ കടന്നേക്കും. യുവതി പുത്തന്കുരിശ് സ്വദേശിയാണെന്നാണ് വിവരം.
