കാസര്‍കോട്: പണമിടപാടിനെ ചൊല്ലിയുള്ള തര്‍ക്കമാണെന്നു പറയുന്നു സീതാംഗോളിയില്‍ യുവാവിനു കുത്തേറ്റു ഗുരുതരം. ബദിയഡുക്കയിലെ കുട്ടന്‍ എന്ന അനില്‍ കുമാറി (36)നാണ് കുത്തേറ്റത്. കുത്തിയ കത്തി കഴുത്തില്‍ തറച്ച നിലയില്‍ ഇയാളെ മംഗ്‌ളൂരുവിലെ ആശുപത്രിയില്‍ പ്രവേശിപ്പിച്ചു. സംഭവത്തില്‍ കുമ്പള പൊലീസ് നാലുപേരെയും രണ്ടു വാഹനങ്ങളും കസ്റ്റഡിയിലെടുത്തു.
ഞായറാഴ്ച രാത്രി 12 മണിയോടെ സീതാംഗോളിയിലാണ് സംഭവം. ബദിയഡുക്കയിലെ മീന്‍ വ്യാപാരിയാണ് അനില്‍ കുമാര്‍.
ഫോണില്‍ വിളിച്ചതിനെ തുടര്‍ന്നാണ് ഇദ്ദേഹം രാത്രിയില്‍ സീതാംഗോളിയില്‍ എത്തിയത്.
കൂടെ ഏതാനും പേര്‍ കൂടി ഉണ്ടായിരുന്നുവെന്നു സംശയിക്കുന്നതായി പൊലീസ് പറഞ്ഞു. സീതാംഗോളിയില്‍ എത്തിയ ശേഷം അവിടെ ഉണ്ടായിരുന്ന മറ്റൊരു സംഘവുമായി ഉണ്ടായ വാക്കു തര്‍ക്കമാണ് കത്തികുത്തില്‍ കലാശിച്ചതെന്നു പൊലീസ് കൂട്ടിച്ചേര്‍ത്തു.
അതേസമയം മംഗ്‌ളൂരുവിലെ ആശുപത്രിയില്‍ കഴിയുന്ന അനില്‍ കുമാറിന്റെ കഴുത്തില്‍ തറച്ച കത്തി നീക്കം ചെയ്യാന്‍ ശസ്ത്രക്രിയ നടത്തേണ്ടി വരുമെന്നു പൊലീസ് വൃത്തങ്ങള്‍ പറഞ്ഞു.
ഓടിക്കൊണ്ടിരിക്കെ മീന്‍ വണ്ടി കത്തി നശിച്ചു; സംഭവം മൊഗ്രാല് പുത്തൂര് ദേശീയപാതയില്
Thursday, 9 October 2025, 14:20
