കണ്ണൂർ: കെഎസ്ആര്‍ടിസിയുടെ ഉല്ലാസയാത്ര ബസ് നിയന്ത്രണംവിട്ട് അപകടം. പയ്യന്നൂരില്‍ നിന്ന് ഇടുക്കിയിലേക്ക് ഉല്ലാസയാത്രയ്ക്ക് പോയ ബസാണ് പനംകുട്ടിക്ക് സമീപം അപകടത്തില്‍പ്പെട്ടത്.16 പേര്‍ക്ക് പരിക്കേറ്റു. 3 പേരുടെ നില ഗുരുതരമാണ്. ഞായറാഴ്ച രാത്രി പത്തോടെയാണു സംഭവം. ബസിന്റെ നിയന്ത്രണം നഷ്ടപ്പെട്ടതാണു കാരണമെന്നാണു നിഗമനം. 36 പേരും രണ്ട് കുട്ടികളുമടങ്ങിയ സംഘമാണ് പയ്യന്നൂരില്‍ നിന്ന് ഗവിയിലേക്കും ഗവിയില്‍ നിന്ന് ഇടുക്കി രാമക്കല്‍മേട്ടിലേക്കുമുള്ള ഉല്ലാസ യാത്രക്ക് പോയത്. രാമക്കല്‍മേട്ടിലെ ഉല്ലാസ യാത്ര കഴിഞ്ഞ് തിരിച്ച് പോരുന്ന വഴിക്കാണ് പനംകുട്ടിക്ക് സമീപമാണ് അപകടമുണ്ടായത്.ബസിന്റെ ബ്രേക്ക് നഷ്ടപ്പെട്ടു തിട്ടില്‍ ഇടിച്ചു നില്‍ക്കുകയായിരുന്നു. പരിക്കേറ്റ 16 പേരില്‍ 10 പേരെ അടിമാലി താലൂക്ക് ആശുപത്രിയിലും ആറ് പേരെ അടിമാലിയില്‍ തന്നെയുള്ള സ്വകാര്യ ആശുപത്രിയിലും പ്രവേശിപ്പിച്ചിരിക്കുകയാണ്.