കാസര്‍കോട്: പാമ്പ് കടിയേറ്റ് ചികിത്സയിലായിരുന്ന ഗൃഹനാഥന്‍ മരിച്ചു. ആദൂര്‍, ആലന്തടുക്കയിലെ ചന്ദ്രന്‍(60) ആണ് മംഗ്‌ളൂരുവിലെ ആശുപത്രിയില്‍ മരിച്ചത്. ആഗസ്റ്റ് 21ന് വീട്ടു പരിസരത്തു വച്ചാണ് ചന്ദ്രന് പാമ്പു കടിയേറ്റത്. ഉടന്‍ ജനറല്‍ ആശുപത്രിയില്‍ എത്തിച്ചു. നില ഗുരുതരമായതിനെ തുടര്‍ന്ന് ദേര്‍ളക്കട്ട, കെ എസ് ഹെഗ്‌ഡെ ആശുപത്രിയിലേയ്ക്ക് മാറ്റി. തീവ്ര പരിചരണ വിഭാഗത്തില്‍ ചികിത്സയില്‍ കഴിയുന്നതിനിടയിലായിരുന്നു അന്ത്യം സംഭവിച്ചത്. ചികിത്സയ്ക്കായി പ്രതിദിനം വന്‍ തുകയാണ്‌ചെലവഴിക്കേണ്ടിവന്നത്. നിര്‍ധന കുടുംബമായതിനാല്‍ ചികിത്സയ്ക്കുള്ള പണം കണ്ടെത്താന്‍ കഴിയാതെ കുടുംബം വിഷമിച്ചപ്പോള്‍ നാട്ടുകാരുടെ നേതൃത്വത്തില്‍ ചികിത്സാ സഹായ കമ്മറ്റി രൂപീകരിച്ച് പ്രവര്‍ത്തിച്ചു വരികയായിരുന്നു. എന്നിട്ടും ചന്ദ്രന്റെ ജീവന്‍ രക്ഷിക്കാന്‍ കഴിയാത്തതിന്റെ സങ്കടത്തിലാണ് ബന്ധുക്കളും നാട്ടുകാരും. സംഭവത്തില്‍ ആദൂര്‍ പൊലീസ് അസ്വാഭാവിക മരണത്തിനു കേസെടുത്തു.
ഭാര്യ: സരോജിനി. മക്കള്‍: നിഥിന്‍, നിരോഷ, നിഷാകുമാരി. മരുമക്കള്‍: പ്രസീത, ശ്രീജിത്ത്, ശശിധരന്‍.