ആരാധകരുടേയും സിനിമാ ലോകത്തിന്റേയും കാത്തിരിപ്പും പ്രാര്‍ത്ഥനകളും ഫലം കണ്ടു. പരിപൂര്‍ണ്ണ ആരോഗ്യവാനായി മമ്മൂട്ടി തിരികയെത്തുന്നു. മമ്മൂട്ടിയുടെ സന്തത സഹചാരികളായ ആന്റോ ജോസഫും ജോര്‍ജുമാണ് ഇക്കാര്യം സോഷ്യല്‍ മീഡിയയിലൂടെ അറിയിച്ചിരിക്കുന്നത്. മാസങ്ങളായി സിനിമയില്‍ നിന്നും വിട്ടു നില്‍ക്കുകയായിരുന്നു മമ്മൂട്ടി. മമ്മൂട്ടിയുടെ തിരിച്ചുവരവില്‍ സന്തോഷവും ആശ്വാസവുമൊക്കെ പങ്കിടുകയാണ് സിനിമാ ലോകം. നിരവധി പേരാണ് ജോര്‍ജിന്റേയും ആന്റോയുടേയും പോസ്റ്റിന് താഴെ തങ്ങളുടെ സന്തോഷം അറിയിച്ചെത്തുന്നത്. ‘സന്തോഷത്തില്‍ നിറഞ്ഞ കണ്ണുകളോടെ കൈകൂപ്പി നിങ്ങളുടെ മുന്നില്‍ ഞാന്‍ നില്‍ക്കുന്നു. പ്രാര്‍ത്ഥിച്ചവര്‍ക്കും, കൂടെ നിന്നവര്‍ക്കും, ഒന്നുമുണ്ടാവില്ല എന്ന് പറഞ്ഞു ആശ്വസിപ്പിച്ചവര്‍ക്കും പറഞ്ഞാല്‍ തീരാത്ത സ്‌നേഹത്തോടെ പ്രിയപ്പെട്ടവരെ…നന്ദി എന്നാണ് ജോര്‍ജ് കുറിച്ചത്. ഈ പോസ്റ്റ് സംവിധായകന്‍ മിഥുന്‍ മാനുവല്‍ തോമസ് പങ്കുവെച്ചിട്ടുണ്ട്.
മമ്മൂട്ടിയുടെ തിരിച്ചുവരവില്‍ മോഹന്‍ലാലും സന്തോഷം പങ്കിട്ടു. മമ്മൂട്ടിയ്ക്കൊപ്പമുള്ള തന്റെ ചിത്രം പങ്കുവച്ചാണ് മോഹന്‍ലാലിന്റെ പ്രതികരണം. വാക്കുകളാല്‍ തന്റെ സന്തോഷത്തെ അറിയിക്കാതെ മമ്മൂട്ടിയ്ക്ക് ഉമ്മ നല്‍കുന്ന ചിത്രമാണ് മോഹന്‍ലാല്‍ പങ്കിട്ടത്. ചിത്രത്തോടൊപ്പം ലവ് ഇമോജിയും മോഹന്‍ലാല്‍ പങ്കിട്ടിട്ടുണ്ട്.