മഞ്ചേശ്വരം: കക്കാനിപ്പോള്‍ സ്വര്‍ണ്ണവും പണവും മതിയെന്ന വാശിയൊന്നും കള്ളന്മാര്‍ക്ക് ഇല്ലാതായിരിക്കുന്നു. എന്തുകിട്ടിയാലും കള്ളന്മാര്‍ അതുകൊണ്ടു തൃപ്തരാണ്.
കഴിഞ്ഞ ദിവസം വൊര്‍ക്കാടി നാവഡരുബൈലു ഹര്‍ഷ വര്‍ധന്‍ വക്കീലിന്റെ വീട്ടില്‍ കയറിയ കള്ളന്മാര്‍ വീട്ടിനുള്ളിലൊക്കെ അരിച്ചുപെറുക്കിയിട്ടും കാര്യമായൊന്നും കക്കാന്‍ കിട്ടിയില്ല. കാണാന്‍ മോശമല്ലാത്ത വീട്ടില്‍ കക്കാന്‍ കയറിയതില്‍ അവര്‍ക്ക് അവരോടു തന്നെ നാണം തോന്നിയിട്ടുണ്ടാവണം. ഇതെന്തൊരു വക്കീലെന്നൊക്കെ ചിന്തിച്ചു നില്‍ക്കുമ്പോഴാണ് വീട്ടിലെ ചെമ്പു പാത്രങ്ങള്‍ കള്ളന്മാരുടെ ശ്രദ്ധയില്‍പ്പെട്ടത്. എങ്കില്‍ അതാകട്ടെ എന്നു നിശ്ചയിച്ചു അന്നത്തെ മോഷണത്തിന് അവരതു ബോണിയാക്കി. ചൊവ്വാഴ്ചയാണ് മോഷണം നടന്നത്. വീടിന്റെ പിന്‍വശത്തെ വാതില്‍ പൊളിച്ചാണ് വീട്ടിനുള്ളില്‍ കള്ളന്മാര്‍ കയറിയത്. പിന്‍വാതില്‍ പൊളിച്ച നിലയിലാണ്. മംഗളൂരു കോടതിയില്‍ അഭിഭാഷകനായ വീട്ടുടമ അന്നു രാവിലെ മംഗളൂരുവില്‍ പോയി വൈകിട്ടു മടങ്ങിയെങ്കിലും വീട്ടിനു പിന്‍വശം ശ്രദ്ധിച്ചില്ല. ബുധനാഴ്ചയാണ് വാതില്‍ പൊളിച്ചതു ശ്രദ്ധയില്‍പ്പെട്ടത്. തുടര്‍ന്നു നടത്തിയ പരിശോധനയിലാണ് നാലു വലിയ ചെമ്പു പാത്രങ്ങള്‍ നഷ്ടപ്പെട്ട വിവരം കണ്ടെത്തിയത്. 50,000 രൂപയുടെയെങ്കിലും നഷ്ടമുണ്ടായിട്ടുണ്ടാവുമെന്നു കരുതുന്നു. മഞ്ചേശ്വരം പൊലീസില്‍ പരാതിപ്പെട്ടു. പൊലീസ് അന്വേഷിക്കുന്നുണ്ട്.