കണ്ണൂർ: തലയോലപ്പറമ്പിൽ മിനിലോറിയും കാറും കൂട്ടിയിടിച്ചുണ്ടായ അപകടത്തിൽ സിപിഐ മുൻ സംസ്ഥാന സെക്രട്ടറി കാനം രാജേന്ദ്രന്റെ ഭാര്യയ്ക്കും മകനും പരുക്ക്. കാനം രാജേന്ദ്രന്റെ ഭാര്യ വനജ രാജേന്ദ്രൻ (65), മകൻ സന്ദീപ് രാജേന്ദ്രൻ (42) എന്നിവർക്കാണ് പരുക്കേറ്റത്. തലയോലപ്പറമ്പ് വടകര തോട്ടം ജംക്ഷനു സമീപമാണ് അപകടമുണ്ടായത്. എറണാകുളത്തേക്കു പോകുകയായിരുന്ന ഇവരുടെ കാർ ഗ്രാനൈറ്റ് കയറ്റി വന്ന മിനിലോറിയുമായി കൂട്ടിയിടിക്കുകയായിരുന്നു. അപകടത്തിൽ കാറിന്റെ മുൻഭാഗം പൂർണമായും തകർന്നു. തലയ്ക്കു സാരമായി പരുക്കേറ്റ ഇരുവരെയും ആശുപത്രിയിൽ പ്രവേശിപ്പിച്ചു. ആശങ്കപ്പെടാനില്ലെന്നും ഇരുവരുടെയും നില തൃപ്തികരമാണെന്നും ആശുപത്രി അധികൃതർ അറിയിച്ചു.