തിരുവനന്തപുരം: ബസിറങ്ങി വീട്ടിലേക്കു നടന്നുപോകുകയായിരുന്ന വയോധികയുടെ സ്വര്‍ണ്ണമാല തട്ടിപ്പറിച്ചെടുക്കാന്‍ ശ്രമിച്ച സ്ത്രീയെ പിടികൂടി. വള്ളക്കടവ് സ്വദേശിനി ശാലിനി (45) യാണ് പിടിയിലായത്. വ്യാഴാഴ്ച ഉച്ചയോടെയായിരുന്നു സംഭവം. പിരപ്പന്‍കോട് കാവിയാട് സ്വദേശിയായ ഓമന ബസ് സ്റ്റോപ്പില്‍ നിന്നും വീട്ടിലേക്കു നടന്നു പോകുമ്പോഴാണ് സംഭവം. ഇട റോഡില്‍ വച്ച് തറയില്‍ തള്ളിയിട്ട ശേഷം ശാലിനി ഓമനയുടെ കഴുത്തില്‍ കിടന്ന സ്വര്‍ണ്ണമാല വലിച്ചു പൊട്ടിക്കുകയായിരുന്നു. ഓമന ബഹളം വച്ചതോടെ രക്ഷപ്പെടാന്‍ ശ്രമിച്ച ശാലിനിയെ നാട്ടുകാര്‍ ചേര്‍ന്നു പിടികൂടുകയായിരുന്നു. കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു. ശാലിനിക്കെതിരെ സമാനമായ കേസുകളൊന്നുമില്ലെന്നാണ് വെഞ്ഞാറമ്മൂട് പൊലീസ് പറയുന്നത്.