കൊച്ചി: എറണാകുളം നോർത്ത് റെയിൽവേ സ്റ്റേഷനിൽ 37 കിലോ കഞ്ചാവുമായി 2 സ്ത്രീകളെ പൊലീസ് പിടികൂടി. ബംഗാൾ മുർഷിദാബാദ് സ്വദേശിനികളായ സോണിയ സുൽത്താൻ, അനിത കാതൂൺ എന്നിവരാണ് പിടിയിലായത്. 3 ട്രോളി ബാഗുകളിലായാണ് ഇവർ കഞ്ചാവ് എറണാകുളത്ത് എത്തിച്ചത്. ഇന്ന് രാവിലെ 10 മണിയോടെ ബെംഗളൂരുവിൽ നിന്നുള്ള ഐലൻഡ് എക്സ്പ്രസിലാണ് ഇവർ കൊച്ചിയിലെത്തിയത്. കഞ്ചാവ് വാങ്ങുന്നവരെ പ്ലാറ്റ്ഫോമിൽ കാത്തിരിക്കവെയാണ് പിടിയിലായത്. ആർപിഎഫ്, ക്രൈം ഇന്റലിജൻസ് ബ്രാഞ്ച്, ഡാൻസാഫ് സംഘം സംയുക്തമായി നടത്തിയ പരിശോധനയിലാണ് കഞ്ചാവ് പിടികൂടിയത്.