ആലപ്പുഴ: സംസ്ഥാനത്ത് മഴക്കെടുതിയിൽ ഒരു ജീവൻ കൂടി പൊലിഞ്ഞു. ആലപ്പുഴ കൈനകരിയിൽ ജലഗതാഗത വകുപ്പ് ജീവനക്കാരൻ തോട്ടിൽ വീണ് മരിച്ചു. കുറ്റിക്കാട്ട്ചിറ മുളമറ്റം വീട്ടിൽ ഓമനക്കുട്ടൻ (55) ആണ് മരിച്ചത്. കനകശ്ശേരി പാടശേഖരത്തിന്റെ പുറംബണ്ടിലൂടെ നടന്നു പോകുമ്പോൾ ശക്തമായ കാറ്റിൽ തോട്ടിലേക്ക് വീഴുകയായിരുന്നു. അഗ്നിരക്ഷാസേന മണിക്കൂറുകളോളം നീണ്ട പ്രയത്നത്തിനൊടുവിലാണ് മൃതദേഹം കണ്ടെടുത്തത്. ഇന്നലെ ആലപ്പുഴ ബീച്ചിൽ മഴയിൽ നിന്നു രക്ഷനേടാൻ കയറി നിന്ന തട്ടുകട ദേഹത്തേക്ക് മറിഞ്ഞു വീണ് 18 വയസ്സുകാരി മരിച്ചിരുന്നു.