ശ്രീനഗർ: ജമ്മുകശ്മീരിലെ കിഷ്ത്വാറിൽ ഭീകരരുമായുണ്ടായ ഏറ്റുമുട്ടലിൽ സൈനികന് വീരമൃത്യു. ചാത്രു മേഖലയിലെ സിംഹപോറ പ്രദേശത്താണ് ഏറ്റുമുട്ടലുണ്ടായത്. 2 ഭീകരരെ സൈന്യം വധിച്ചു. ഓപ്പറേഷൻ ത്രാഷി എന്നു പേരു നൽകിയിട്ടുള്ള ദൗത്യം തുടരുകയാണ്. നാലോളം ജെയ്ഷെ മുഹമ്മദ് ഭീകരർ പ്രദേശത്ത് ഒളിച്ചിരിപ്പുണ്ടെന്ന വിവരത്തെ തുടർന്ന് വ്യാഴാഴ്ച രാവിലെ 8.59ഓടെ സുരക്ഷാസേന പ്രദേശം വളയുകയായിരുന്നു. തുടർന്നുണ്ടായ ഏറ്റുമുട്ടലിനിടെ ഗുരുതരമായി പരുക്കേറ്റ സൈനികനാണ് ചികിത്സയ്ക്കിടെ വീരമൃത്യു വരിച്ചത്. കൂടുതൽ സൈനികർ ഭീകരരെ നേരിടാൻ പ്രദേശത്തേക്കു തിരിച്ചതായും അധികൃതർ അറിയിച്ചു.