ന്യൂഡൽഹി: 90 കളിലെ കുട്ടികളുടെയും മുതിർന്നവരുടെയും ഇഷ്ട സൂപ്പർ ഹീറോയാണ് ശക്തിമാൻ. ദൂരദർശനിൽ സംപ്രേഷണം ചെയ്ത സീരിയലിൽ ശക്തിമാനായി വേഷമിട്ട മുകേഷ് ഖന്ന തിരിച്ചു വരവിനൊരുങ്ങുകയാണ്. ഇത്തവണ ശബ്ദ രൂപത്തിലാണ് മുകേഷ് ഖന്ന ശക്തിമാനാകുക. പോക്കറ്റ് എഫ്എം പുറത്തിറക്കുന്ന ‘ദ ലഗസി ഓഫ് ശക്തിമാൻ’ എന്ന ഓഡിയോ സീരീസിലാകും മുകേഷ് ഖന്ന ശക്തിമാനു ശബ്ദം നൽകുക. രാജ്യത്തെ യുവതീയുവാക്കളുടെ മുന്നിൽ ശക്തിമാനെ വീണ്ടും അവതരിപ്പിക്കാനുള്ള അവസരമാണിതെന്ന് നടൻ പ്രതികരിച്ചു. 1997 സെപ്റ്റംബർ 13നാണ് ശക്തിമാൻ പരമ്പരയുടെ ആദ്യ എപ്പിസോഡ് ദൂരദർശൻ സംപ്രേഷണം ചെയ്തത്. 2005 മാർച്ച് 27 വരെ ഇതു തുടർന്നു. സീരിയൽ നിർമിച്ചതും മുകേഷ് ഖന്നയായിരുന്നു.