കാസര്‍കോട്: മര്‍ത്യയിലുള്ള മര്‍ത്യ-പെര്‍ള ജുമാമസ്ജിദ് അങ്കണത്തിലെ ഭണ്ഡാരപ്പെട്ടിയുടെ പൂട്ട് തകര്‍ത്തു 10,000 രൂപ കവര്‍ച്ച ചെയ്തു. ഏപ്രില്‍ 19നു രാത്രി 11 മണിക്കും 20നു പുലര്‍ച്ചെ 4.30 മണിക്കും ഇടയിലാണ് കവര്‍ച്ച നടന്നതെന്നു സംശയിക്കുന്നു. മസ്ജിദ് കമ്മിറ്റി ഭാരവാഹിയായ എ. ഷാഹുല്‍ ഹമീദ് നല്‍കിയ പരാതിയില്‍ ബദിയഡുക്ക പൊലീസ് കേസെടുത്തു. മോഷ്ടാവിന്റേതെന്നു സംശയിക്കുന്ന ആളുടെ ദൃശ്യങ്ങള്‍ സിസിടിവി ക്യാമറയില്‍ പതിഞ്ഞിട്ടുണ്ട്. ദൃശ്യം പരിശോധിച്ചു വരികയാണെന്നും മോഷ്ടാവിനെ ഉടന്‍ കണ്ടെത്താനാകുമെന്നുമാണ് പ്രതീക്ഷയെന്നും പൊലീസ് വൃത്തങ്ങള്‍ പറഞ്ഞു.