ന്യൂദെല്‍ഹി: നിയമസഭ പാസാക്കിയ ബില്ലുകള്‍ അനിശ്ചിതകാലം പിടിച്ചു വയ്ക്കുവാന്‍ ഗവര്‍ണ്ണര്‍ക്കു അധികാരം ഇല്ലെന്നു സുപ്രിംകോടതി. തമിഴ്‌നാട് നിയമസഭ പാസാക്കിയ 10 ബില്ലുകള്‍ ഗവര്‍ണര്‍ തടഞ്ഞുവച്ചുവെന്ന ഹര്‍ജി പരിഗണിച്ചു കൊണ്ടാണ് സുപ്രിം കോടതി വിധി പറഞ്ഞത്.
നിയമസഭ പാസാക്കിയ ബില്ലുകള്‍ അനിശ്ചിതകാലം പിടിച്ചു വച്ച തമിഴ്‌നാട് ഗവര്‍ണര്‍ ആര്‍എന്‍ രവിയെ രൂക്ഷമായി വിമര്‍ശിച്ചു കൊണ്ടാണ് സുപ്രിം കോടതി വിധി പറഞ്ഞത്. നിയമസഭ പാസാക്കിയ ബില്ലുകളില്‍ ഗവര്‍ണര്‍ക്ക് വീറ്റോ അധികാരം ഇല്ല. ബില്ലുകളില്‍ മൂന്നു മാസത്തിനകം തീരുമാനമെടുക്കണം. സര്‍ക്കാരിന്റെ ഉപദേശമനുസരിച്ചായിരിക്കണം ഗവര്‍ണര്‍ പ്രവര്‍ത്തിക്കേണ്ടത്. ജനങ്ങളുടെ ആവശ്യത്തിനു വേണ്ടിയാണ് നിയമങ്ങള്‍ കൊണ്ടുവരുന്നത്. സഭ രണ്ടാമതും പാസാക്കിയ ബില്ലുകളില്‍ ഒരു മാസത്തിനകം തീരുമാനം എടുക്കണമെന്നും ഭരണഘടനയെ മറി കടക്കുന്ന ബില്ലുകള്‍ പാടില്ലെന്നും സുപ്രിം കോടതി വ്യക്തമാക്കി.
