കോട്ടയം: മറിഞ്ഞ ലോറിയിലെ ചത്ത കോഴികളെ റോഡരികില്‍ നിന്ന് കൈക്കലാക്കുന്ന നാട്ടുകാരുടെ ദൃശ്യങ്ങള്‍ സോഷ്യല്‍ മീഡിയയില്‍ വൈറല്‍. മൂവാറ്റുപുഴയില്‍ നിന്ന് കൊല്ലത്തേക്ക് പോയ കൊഴികളെ കൊണ്ടുപോയ ലോറിയാണ് മറിഞ്ഞത്. നാഗമ്പടം എസ് എച്ച് മൗണ്ടില്‍ ഞായറാഴ്ച പുലര്‍ച്ചെയോടെയായിരുന്നു സംഭവം. ലോറിക്കുള്ളിലുണ്ടായിരുന്ന ചത്ത കോഴികളെ റോഡരികിലായി കൂട്ടിയിട്ടിരുന്നു. ആ കൂമ്പാരത്തില്‍ നിന്നാണ് നാട്ടുകാര്‍ കോഴികളെ ധൃതിപ്പെട്ട് കവറിലാക്കിക്കൊണ്ടുപോയത്. ചിലര്‍ വലിയ കവറുമായെത്തി കോഴികളെ ശേഖരിക്കുന്നതും വിഡിയോവില്‍ കാണാം. മറ്റുചിലര്‍ സ്‌കൂട്ടറുകളും ഓട്ടോറിക്ഷകളിലും എത്തി ചത്ത കോഴികളുമായി മടങ്ങുന്നതും വിഡിയോവില്‍ കാണാം. കോഴികളെ കൈക്കലാക്കി ചിരിയോടെ മടങ്ങുന്ന നാട്ടുകാരുടെ വീഡിയോ സമൂഹമാധ്യമങ്ങളില്‍ വൈറലാണ്. ആ നാട്ടുകാരെ പരിഹസിച്ചുകൊണ്ടുളള കമന്റുകള്‍ ഇതിനോടകം തന്നെ വീഡിയോക്ക് താഴെ ലഭിച്ചുകൊണ്ടിരിക്കുകയാണ്. മുമ്പ് മദ്യക്കുപ്പികള്‍ കൊണ്ടുപോയ ലോറി അപകടത്തില്‍പ്പെട്ടപ്പോഴുണ്ടായ സംഭവവികാസങ്ങളും അവസാനം ചര്‍ച്ചയായതാണ്.
