കണ്ണൂര്‍: യാത്രക്കാരെ ഇറക്കാനായി തുറന്ന ബസിന്റെ വാതിലിടിച്ച് കാല്‍നടയാത്രക്കാരന്‍ മരിച്ചു. കല്യാശ്ശേരി വീവേഴ്‌സിലെ മുന്‍തൊഴിലാളിയും ബക്കളത്തെ വ്യാപാരിയുമായിരുന്ന കടമ്പേരി റോഡിലെ കുന്നില്‍ ഹൗസിലെ കെ രാജന്‍ (77) ആണ് മരിച്ചത്.
ശനിയാഴ്ച രാവിലെയാണ് അപകടം. ബക്കളം പാല്‍സൊസൈറ്റിയില്‍ പാല്‍വാങ്ങാന്‍ പോയതായിരുന്നു രാജന്‍. വീട്ടിലേയ്ക്ക് മടങ്ങുന്നതിനിടയില്‍ എത്തിയ സ്വകാര്യ ബസാണ് അപകടത്തിനു ഇടയാക്കിയത്. കാല്‍നടയാത്രക്കാരനായ രാജന്‍ ഡോറിടിച്ച് വീണിട്ടും ബസ് നിര്‍ത്താതെ പോയി. ബസിന്റെ പിന്നില്‍ തളിപറമ്പ് പൊലീസ് കണ്‍ട്രോള്‍ റൂമിന്റെ വാഹനവും ഉണ്ടായിരുന്നു. അപകടദൃശ്യം കണ്ട പൊലീസുകാര്‍ ബസിനെ പിന്തുടര്‍ന്ന് കുറ്റിക്കോലില്‍ വച്ച് തടഞ്ഞ് നിര്‍ത്തി ബസ് കസ്റ്റിഡിയിലെടുത്തു.
ഇതിനിടയില്‍ ഗുരുതരമായി പരിക്കേറ്റ രാജനെ പരിസരവാസികള്‍ തളിപ്പറമ്പ് സഹകരണ ആശുപത്രിയില്‍ എത്തിച്ചുവെങ്കിലും രക്ഷിക്കാനായില്ല.
ഭാര്യ: സുമതി. മക്കള്‍: സജു, സൂരജ്, പരേതയായ സുജ. മരുമകള്‍:ഷീമ. സഹോദരങ്ങള്‍: ശ്രീധരന്‍, ചന്ദ്രന്‍, വത്സലന്‍, തങ്കം, ബാലന്‍.
കുമ്പള ടൗണിന്റെ വാതിലടയ്ക്കരുതേ: രോദനവുമായി കുമ്പള
Friday, 14 March 2025, 14:57
