കണ്ണൂര്‍: പരിയാരം ഗവ.മെഡിക്കല്‍ കോളേജില്‍ വീണ്ടും പാമ്പ്. 503-ാം നമ്പര്‍ സ്‌പെഷല്‍ വാര്‍ഡിലെ ശുചിമുറിയിലാണ് വ്യാഴാഴ്ച രാവിലെ വിഷമില്ലാത്ത കാട്ടുപാമ്പിനെ കണ്ടത്. വാര്‍ഡിലെ രോഗി രാവിലെ പ്രാഥമിക കര്‍മങ്ങള്‍ക്കായി മുറി തുറന്നപ്പോഴാണ് പാമ്പിനെ കണ്ടത്. രോഗിയോടൊപ്പമുള്ള കൂട്ടിരിപ്പുകാര്‍ ഉടന്‍ തന്നെ പാമ്പിനെ തല്ലിക്കൊന്നു. സെപ്റ്റംബര്‍ 19ന് രാത്രിയില്‍ നവജാതശിശുക്കളുടെ ഐസിയുവിന് പുറ ത്ത് നിന്നും കാട്ടുപാമ്പിനെ കണ്ടിരുന്നു. രോഗികളുടെ കൂട്ടിരിപ്പുകാര്‍ തല്ലിക്കൊന്നിരുന്നു. രണ്ടുമാസം മുമ്പ് കാര്‍ഡിയോളജി വിഭാഗത്തില്‍ നിന്ന് കാട്ടുപാമ്പിനെ പിടികൂടിയിരുന്നു. ആശുപതിക്കുചുറ്റും പടര്‍ന്നു കിടക്കുന്ന കാട്ടുവള്ളികളിലൂടെയാണ് പാമ്പുകള്‍ അകത്തേക്ക് കയറിയതെന്നാണ് കരുതുന്നത്.
നവീകരണ പ്രവര്‍ത്തനങ്ങളുടെ ഭാഗമായി പലയിടങ്ങളിലും മെഡിക്കല്‍ കോളേജിനകത്ത് പൊളിച്ച് കളഞ്ഞ വസ്തുക്കളും നിര്‍മാണ വസ്തുക്കളും പൈപ്പുകളും മാസങ്ങളായി കെട്ടിടത്തിനകത്ത് പലയിടങ്ങളായി കൂട്ടിയിട്ട നിലയിലാണ്. ഇതിനകത്ത് കയറിക്കൂടുന്ന പാമ്പുകളടക്കമുള്ള ഇഴജന്തുക്കളാണ് രോഗികള്‍ക്കും കൂട്ടിരിപ്പുകാര്‍ക്കും ജീവനക്കാര്‍ക്കും ഒരുപോലെ ഭീഷണിയായിരിക്കുന്നത്.
