ഷിരൂര്‍: കര്‍ണ്ണാടകയിലെ ഷിരൂരില്‍ മണ്ണിടിച്ചല്‍ ഉണ്ടായ സ്ഥലത്തു നിന്നു നാലു കിലോമീറ്റര്‍ അകലെ ജീര്‍ണ്ണിച്ച നിലയില്‍ മൃതദേഹം കണ്ടെത്തി. പുരുഷന്റേതാണ് മൃതദേഹം. അകനാശിനി, ബാഡമേഖലയിലെ കടല്‍ത്തീരത്താണ് മൃതദേഹം കണ്ടെത്തിയതെന്നു മുങ്ങല്‍ വിദഗ്ധനായ ഈശ്വര്‍ മല്‍പ്പ പറഞ്ഞു. കോഴിക്കോട് സ്വദേശിയായ അര്‍ജ്ജുന്‍, ഷിരൂരിലെ മത്സ്യത്തൊഴിലാളി എന്നിവരെ മണ്ണിടിച്ചലില്‍ കാണാതായിരുന്നു. ഇവര്‍ക്കായി നേരത്തെ ദിവസങ്ങളോളം തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല. മൃതദേഹം ആരുടേതാണെന്നു തിരിച്ചറിയുന്നതിനു ഡി.എന്‍.എ ടെസ്റ്റ് നടത്തും. ഇതിനായി അര്‍ജ്ജുന്റെ സഹോദരന്റെ സാമ്പിള്‍ നേരത്തെ അധികൃതര്‍ ശേഖരിച്ചുവച്ചിരുന്നു.
