കൊല്ലം:നവകേരള യാത്രക്കെതിരെ പ്രതിപക്ഷ യുവജന സംഘടനകള് പ്രതിഷേധിക്കുന്നതിനിടെ മുഖ്യമന്ത്രിയുടെ സുരക്ഷാ ചുമതലയുള്ള ഉദ്യോഗസ്ഥൻ ഭീഷണിയുമായി സമൂഹ മാധ്യമത്തിൽ പോസ്റ്റിട്ടു.മുഖ്യമന്ത്രി പിണറായി വിജയന്റെ എസ്കോര്ട്ട് ഉദ്യോഗസ്ഥനായ എം.എസ്. ഗോപി കൃഷ്ണനാണ് ഫേസ്ബുക്കില് കമന്റിട്ടത്. ‘കഴിയുമെങ്കില് വണ്ടി വഴിയില് തടയൂ, കൊല്ലം കടയ്ക്കലില് വച്ച്. എല്ലാ മറുപടിയും അന്നു തരാം’ എന്നായിരുന്നു ഗോപി കൃഷ്ണന്റെ കമന്റ്.
കുമ്മിള് പഞ്ചായത്ത് അംഗവും യൂത്ത് കോണ്ഗ്രസ് നേതാവുമായ കുമ്മിള് ഷെമീറിന്റെ ഫേസ്ബുക്ക് കുറിപ്പിന് താഴെ കമന്റായാണ് എം.എസ്. ഗോപി കൃഷ്ണൻ ഭീഷണി സന്ദേശം കുറിച്ചത്. മുഖ്യമന്ത്രിയുടെ ഓഫിസില് ജോലി ചെയ്യുന്ന പൊലീസ് ഉദ്യോഗസ്ഥനാണ് എം.എസ്. ഗോപികൃഷ്ണൻ. എന്നാല്, നവകേരള സദസ്സിനു പോയിട്ടുള്ള മുഖ്യമന്ത്രിയുടെ സുരക്ഷാ സംഘത്തില് ഇയാളെ ഉള്പ്പെടുത്തിയിട്ടില്ല. കഴിഞ്ഞ ദിവസം മുഖ്യമന്ത്രിയുടെ ഗൺമാൻ പ്രതിഷേധിച്ചവരെ അടിച്ചത് വലിയ വിവാദമായിരുന്നു.