ബംഗളൂരു: ചിക്കജാല പൊലീസ് സ്റ്റേഷൻ സബ് ഇൻസ്പെക്ടർ പി.ശിവണ്ണയെ രണ്ട് ലക്ഷം രൂപ കൈക്കൂലി വാങ്ങുന്നതിനിടെ ലോകായുക്ത പൊലീസ് അറസ്റ്റ് ചെയ്തു .
രവികുമാർ എന്നയാളുടെ പരാതിയിലാണ് നടപടി.
ചിക്കജാല പൊലീസ് സ്റ്റേഷനിൽ രവികുമാറിനെതിരെ വഞ്ചനാ കേസ് രജിസ്റ്റർ ചെയ്തിരുന്നു. കേസിൽ ‘ബി റിപ്പോർട്ട്’ ഫയൽ ചെയ്യാൻ ശിവണ്ണ മൂന്ന് ലക്ഷം രൂപ കൈക്കൂലി ആവശ്യപ്പെട്ടതായാണ് പരാതി. പരാതികളിൽ
പൊലീസ് കോടതിയിൽ സമർപ്പിക്കുന്ന അന്തിമ റിപ്പോർട്ടാണ് ബി.റിപ്പോർട്ട്.പരാതി വ്യാജമാണെന്നും ദുരുദ്ദേശ്യപരമാണെന്നും ഒരു കുറ്റകൃത്യവും സംഭവിച്ചിട്ടില്ലെന്നും പ്രതി കുറ്റക്കാരനല്ലെന്നും അദ്ദേഹത്തെ കുറ്റവിമുക്തനാക്കണം എന്നും സൂചിപ്പിക്കുന്ന റിപ്പോർട്ടാണിത്.
തൻ്റെ പരാതിയിൽ കൈക്കൂലി നൽകാൻ തയ്യാറാകാതെ രവികുമാർ ലോകായുക്ത പൊലീസിനെ സമീപിച്ച് പരാതി നൽകുകയായിരുന്നു.
ലോകായുക്ത പൊലീസ് ഒരുക്കിയ കെണിയനുസരിച്ച് പൊലീസ് സ്റ്റേഷന് സമീപം നിർത്തിയിട്ടിരുന്ന ശിവണ്ണയുടെ ഇരുചക്രവാഹനത്തിനടുത്തു രവികുമാർ രണ്ട് ലക്ഷം രൂപയുമായി എത്തുകയും
ശിവണ്ണ പണം സ്വീകരിക്കുന്നതിനിടെ ലോകായുക്ത ഉദ്യോഗസ്ഥർ സാക്ഷികളുടെ സാന്നിധ്യത്തിൽ പൊലീസ് ഉദ്യോഗസ്ഥനെ കയ്യോടെ പിടികൂടുകയുമായിരുന്നു.