കാസര്‍കോട്: വീടു നിര്‍മാണത്തിനിടെ രണ്ടാംനിലയില്‍ നിന്ന് വീണ് സെന്‍ട്രിംഗ് തൊഴിലാളിക്ക് ദാരുണാന്ത്യം. കുമ്പള ഷേഡിക്കാവ് സ്വദേശി ശങ്കര്‍ എന്ന ഗംഗു(52) ആണ് മരിച്ചത്. ശനിയാഴ്ച ഉച്ചയ്ക്ക് രണ്ടുമണിയോടെ നാരായണമംഗലത്തെ ഇരുനില വീടിന്റെ നിര്‍മാണത്തിനിടെയാണ് അപകടം. നിലത്തുനീണ ശങ്കറിനെ മറ്റു തൊഴിലാളികള്‍ ഉടന്‍ കുമ്പളയിലെ ജില്ലാ സഹകരണ ആശുപത്രിയിലെത്തിച്ചെങ്കിലും മരിച്ചിരുന്നു. പൊലീസെത്തി മൃതദേഹം കാസര്‍കോട് ജനറല്‍ ആശുപത്രി മോര്‍ച്ചറിയിലേക്ക് മാറ്റും. അവിവാഹിതനാണ് ശങ്കര്‍. പരേതരായ നാരായണ ഷെട്ടിയുടെയും നമ്മക്കയുടെയും മകനാണ്. സഹോദരങ്ങള്‍: സദാ ഷെട്ടി, വിമല, ലക്ഷ്മി.