തളിപ്പറമ്പ്: എം.ഡി.എം.എ എത്തിച്ചുനല്‍കുന്ന ആംബുലന്‍സ് ഡ്രൈവര്‍ എക്സൈസിന്റെ പിടിയിലായി. തളിപ്പറമ്പ് കണ്ടി വാതുക്കല്‍ താമസിക്കുന്ന ആംബുലന്‍സ് ഡ്രൈവര്‍ കായക്കൂല്‍ പുതിയ പുരയില്‍ വീട്ടില്‍ കെ.പി.മുസ്തഫ(37) ആണ് പിടിയിലായത്. ഓണം സ്പെഷ്യല്‍ ഡ്രൈവിന്റെ ഭാഗമായി തളിപ്പറമ്പ് റേഞ്ച് എക്സൈസ് തളിപ്പറമ്പ് ടൗണ്‍ കേന്ദ്രീകരിച്ച് നടത്തിയ റെയ്ഡിലാണ് കണ്ടിവാതുക്കല്‍ എന്ന സ്ഥലത്ത് വെച്ച് 430 മില്ലി ഗ്രാം എം.ഡി.എം.എ സഹിതം പിടിയിലായത്. അസിസ്റ്റന്റ് എക്സൈസ് ഇന്‍സ്പെക്ടര്‍ (ഗ്രേഡ്) പി.കെ രാജീവന്റെ നേതൃത്വത്തിലാണ് പ്രതിയെ അറസ്റ്റ് ചെയ്തത്. രോഗികളുമായി കര്‍ണാടകയിലെ ആശുപത്രികളിലേക്ക് പോയി തിരിച്ചുവരുമ്പോള്‍ അവിടെനിന്നും എം.ഡി.എം.എ വാങ്ങി നാട്ടിലെത്തിക്കുകയാണ് പതിവ്. നാട്ടില്‍ എത്തിയതിനു ശേഷം ചെറു പൊതികളിലാക്കി ആവശ്യക്കാര്‍ക്ക് വിതരണം ചെയ്യും. നേരിട്ട് കയ്യില്‍ കൊടുക്കാതെ ഭദ്രമാക്കി ഏതെങ്കിലും ഒരു സ്ഥലത്ത് വെച്ച് അതിന്റെ ഫോട്ടോ എടുത്ത് ആവശ്യക്കാര്‍ക്ക് ലൊക്കേഷന്‍ അയച്ചുകൊടുക്കുകയാണ് രീതിയെന്നും രഹസ്യവിവരം ലഭിച്ചതിനെ തുടര്‍ന്ന് ഇയാളെ മാസങ്ങളായി നിരീക്ഷിച്ചു വരികയായിരുന്നുവെന്നും എക്സൈസ് ഉദ്യോഗസ്ഥര്‍ പറഞ്ഞു. കര്‍ണാടകയില്‍ നിന്നും കേരളത്തിലേക്ക് മാരക മയക്കുമരുന്ന് എത്തിച്ചു വിതരണം ചെയ്യുന്ന പ്രധാന കണ്ണികളില്‍ ഒരാളാണ് ഇയാള്‍. രോഗികളുമായി വരുന്ന ആംബുലന്‍സ് എക്സൈസ്, പൊലീസ് പരിശോധന ഇല്ലാതെ കടന്നുപോകാം എന്ന ധാരണയിലാണ് ആംബുലന്‍സില്‍ മയക്കുമരുന്ന് കടത്തുന്നത്.
എസ്.എം.എഫ്. ദക്ഷിണ കന്നഡ അഡ്ഹോക് കമ്മിറ്റി രൂപീകരിച്ചു
Saturday, 13 September 2025, 16:20
