ഷിക്കാഗോ: രണ്ടുതവണ ചന്ദ്രനിലേക്കുപോയ ആദ്യ ബഹിരാകാശ സഞ്ചാരി ജിം ലോവല്‍ അന്തരിച്ചു. 97 വയസായിരുന്നു. ഇല്ലിനോയിലെ ലേക്ക് ഫോറസ്റ്റില്‍ വച്ചായിരുന്നു അന്ത്യം സംഭവിച്ചത്. നാസയാണ് മരണ വിവരം സ്ഥിരീകരിച്ചത്. നാസയുടെ പരാജയപ്പെട്ട ചാന്ദ്രദൗത്യം അപ്പോളോ 13-ന്റെ കമാന്‍ഡറും ജിം ലോവല്‍ എന്നറിയപ്പെട്ടിരുന്ന ജെയിംസ് ആര്‍തര്‍ ലോവല്‍ ആയിരുന്നു. നാസയില്‍ ഏറ്റവുംകൂടുതല്‍ ബഹിരാകാശയാത്രചെയ്ത സഞ്ചാരികളിലൊരാള്‍ കൂടിയാണ് അന്തരിച്ച ജിം ലോവല്‍.
1968-ല്‍, ലോവല്‍, ഫ്രാങ്ക് ബോര്‍മാന്‍, വില്യം ആന്‍ഡേഴ്സ് എന്നിവരടങ്ങിയ അപ്പോളോ 8 ക്രൂ ആയിരുന്നു ഭൂമിയുടെ ഭ്രമണപഥം വിട്ട് ആദ്യമായി ചന്ദ്രനിലേക്ക് പറന്ന് അതിനെ വലംവച്ചത്. അവര്‍ക്ക് ഇറങ്ങാന്‍ കഴിഞ്ഞില്ല, പക്ഷേ ബഹിരാകാശ മത്സരത്തില്‍ അവര്‍ യുഎസിനെ സോവിയറ്റുകളെക്കാള്‍ മുന്നിലെത്തിച്ചു. അപ്പോളോ 8 ദൗത്യത്തിലും ഭാഗമായിരുന്ന ലോവല്‍, രണ്ടുതവണ ചന്ദ്രനിലേക്കുപോയ ആദ്യ ബഹിരാകാശ സഞ്ചാരിയാണ്. നാസയുടെ ജെമിനി 7, ജെമിനി 12 ദൗത്യങ്ങളുടേയും ഭാഗമായിരുന്നു.
1970 ഏപ്രില്‍ 11-ന് കെന്നഡി സ്‌പെയ്സ് സെന്ററില്‍നിന്നായിരുന്നു അപ്പോളോ 13 വിക്ഷേപിച്ചത്. പേടകത്തിന്റെ സര്‍വീസ് മൊഡ്യൂളിലെ ഒരു ഓക്‌സിജന്‍ സംഭരണി പൊട്ടിത്തെറിച്ചതാണ് ദൗത്യം പരാജയപ്പെടാനിടയാക്കിയത്. പേടകത്തിന്റെ വൈദ്യുതസംവിധാനങ്ങളടക്കം പ്രവര്‍ത്തനരഹിതമാക്കിയതിനെത്തുടര്‍ന്ന് ലാന്‍ഡിങ് നിര്‍ത്തിവെച്ചു. തുടര്‍ന്ന്, പേടകത്തിലെ ജീവന്‍രക്ഷാസംവിധാനങ്ങളുടെ പിന്തുണയോടെ ഏപ്രില്‍ 17-ന് ലോവലും സംഘവും സുരക്ഷിതമായി ഭൂമിയിലേക്ക് മടങ്ങി. ലോവലായിരുന്നു ദൗത്യത്തിന് നേതൃത്വം നല്‍കിയിരുന്നത്.