കോഴിക്കോട്: യശ്വന്ത്പൂർ – കണ്ണൂർ എക്സ്പ്രസിലെ യാത്രക്കാരന് എലിയുടെ കടിയേറ്റു. കോഴിക്കോട് ചെറുപ്പ സ്വദേശി കെ സി ബാബുവി(64)നെയാണ് സ്ലീപ്പർ എലി കടിച്ചത്. ചൊവ്വാഴ്ച്ച പുലർച്ചെ നാലരയോടെയാണ് ബാബുവിൻ്റെ കാലിൻ്റെ പെരുവിരലിന് എലി കടിച്ചത്. സ്ലീപ്പർ കോച്ചിൽ ഉറങ്ങുന്നതിനിടെയാണ് സംഭവം. യശ്വന്ത്പൂർ – കണ്ണൂർ എക്സ്പ്രസിൽ യശ്വന്ത്പൂർ നിന്ന് കോഴിക്കോട്ടേക്കുള്ള യാത്രക്കാരനായിരുന്നു കെ സി ബാബു. കോഴിക്കോട് റെയിൽവെ സ്റ്റേഷനിൽ എത്തിയ ഉടൻ റെയിൽവെ അധികൃതർ പ്രാഥമിക ചികിത്സ നൽകി. പിന്നീട് മെഡിക്കൽ കോളേജിൽ ചികിത്സ തേടി. വിഷബാധക്കെതിരായ വാക്സിൻ എടുത്തു. ഇനി 3 തവണ കൂടി കുത്തിവെയ്പ്പ് എടുക്കണമെന്ന് ഡോക്ടർമാർ നിർദ്ദേശിച്ചു. തിരൂരിൽ ഇറങ്ങിയ മറ്റൊരു യാത്രക്കാരനും എലിയുടെ കടിയേറ്റതായി ബാബു പറഞ്ഞു. കോച്ചിൽ വൃത്തിഹീന സാഹചര്യമായിരുന്നുവെന്നും നിയമ നടപടി സ്വീകരിക്കുമെന്നും ബാബു അറിയിച്ചു.