കാസർകോട്: വർദ്ധിച്ചുവരുന്ന വാഹന അപകടങ്ങളെ തുടർന്ന് കുമ്പളയിൽ നിയമലംഘനം നടത്തുന്നവർക്കെതിരെ പൊലീസ് നടപടി ശക്തമാക്കി. ബന്തിയോട്ട് ടൗണിൽ ഡി വൈ എസ് പി സി കെ സുനിൽകുമാറിന്റെയും എസ് ഐ കെ ശ്രീജേഷിന്റെയും നേതൃത്വത്തിൽ 15 ഓളം ഇരുചക്ര വാഹനങ്ങളെ പിടികൂടി. ലൈസൻസ് ഇല്ലാതെ വാഹനം ഓടിച്ചവരെയാണ് പിടികൂടിയത്. വാഹനങ്ങളെ കസ്റ്റഡിയിലെടുത്ത് പൊലീസ് സ്റ്റേഷനിലേക്ക് മാറ്റി. കുട്ടി ഡ്രൈവർമാർ വാഹനം ഓടിച്ചു അപകടം വരുത്തുന്നത് വർദ്ധിച്ചുവരികയാണ്. വാഹനാപകടങ്ങൾ കുറക്കുക എന്ന ലക്ഷ്യത്തോടെയാണ് ഇരുചക്രവാഹങ്ങൾക്കെതിരെ നടപടി ആരംഭിച്ചത്. വരും ദിവസങ്ങളിലും നടപടി കർശനമാക്കുമെന്ന് പൊലീസ് അറിയിച്ചു.