തിരുവനന്തപുരം: സിപിഎം സംസ്ഥാന കമ്മിറ്റിയുടെ പുതിയ ആസ്ഥാനമന്ദിരമായ എകെജി സെന്റർ മുഖ്യമന്ത്രി പിണറായി വിജയൻ ഇന്ന് ഉദ്ഘാടനം ചെയ്യും. വൈകിട്ട് 5ന് നടക്കുന്ന ചടങ്ങിൽ മന്ദിരത്തിനു മുന്നിൽ സ്ഥാപിച്ച എകെജിയുടെ അർധകായ പ്രതിമയും അനാഛാദനം ചെയ്യും.
32 സെന്റ് ഭൂമിയിൽ 9 നിലകളിലാണ് പുതിയ ആസ്ഥാന മന്ദിരം നിർമിച്ചിട്ടുള്ളത്. താഴത്തെ 3 നിലകളിൽ ഓഫിസും സമ്മേളന ഹാളും യോഗങ്ങൾ നടത്താനുള്ള മുറികളുമാണ്. ഇതിനു മുകളിൽ നേതാക്കൾക്കുള്ള താമസ സൗകര്യവുമുണ്ട്. സെക്രട്ടറിയേറ്റ് അംഗങ്ങളുടെ ഓഫിസുകളും ഇവിടുണ്ടാകും.
ഏറ്റവും മുകളിലെ മുറിയിൽ ഭക്ഷണ ഹാളും വ്യായാമ സൗകര്യങ്ങളും. താഴെ 2 ഭൂഗർഭ അറകളിലായി 40 വാഹനങ്ങൾക്കുള്ള പാർക്കിങ് സംവിധാനവുമുണ്ട്.
പുതിയ എകെജി സെന്റർ വരുന്നതോടെ പഴയ എകെജി സെന്റർ പഠന ഗവേഷണ കേന്ദ്രമാകും.