പന്തളം: ദേശീയ പാത നിർമാണത്തിനിടെ മണ്ണുമാന്തിയന്ത്രം മറിഞ്ഞ് ഇതര സംസ്ഥാന തൊഴിലാളിയായ യുവാവ് മരിച്ചു. പശ്ചിമബംഗാൾ സ്വദേശി സൂരജാണ് മരിച്ചത്. ജോലിക്കു നിയോഗിക്കപ്പെട്ട ആദ്യ ദിനമാണ് ദാരുണാന്ത്യം. കുളനട കടലിക്കുന്ന് വട്ടയം ഭാഗത്ത് ഉച്ചയ്ക്ക് 2.30നാണ് അപകടമുണ്ടായത്. മണ്ണെടുപ്പ് നടക്കുന്നതിനിടെ മണ്ണുമാന്തിയന്ത്രം നിയന്ത്രണം വിട്ട് മറിയുകയായിരുന്നു. ഇതിനിടയിൽ പെട്ട സൂരജ് തൽക്ഷണം മരിച്ചു. അഗ്നിരക്ഷ സംഘമെത്തി മൃതദേഹം പുറത്തെടുത്തു. കരാർ കമ്പനി ഉദ്യോഗസ്ഥരെത്തിയ ശേഷം തുടർ നടപടികൾ സ്വീകരിക്കുമെന്ന് പൊലീസ് അറിയിച്ചു.