മുംബൈ: ട്രെയിൻ യാത്രയ്ക്കിടയിൽ ഇനി പണം പിൻവലിക്കാം. ചരിത്രത്തിലാദ്യമായി ട്രെയിനിൽ എടിഎം സ്ഥാപിച്ചു.ഇന്ത്യൻ റെയിൽവേയുടെ 172-ാം വാർഷികത്തിന്റെ ഭാഗമായാണ് ഇത്.. മുംബൈ-മൻമദ് പഞ്ചവതി എക്സ്പ്രസിലാണ് എടിഎം സ്ഥാപിച്ചത്. ബാങ്ക് ഓഫ് മഹാരാഷ്ട്രയുമായി ചേർന്നാണ് റെയിൽവേ പദ്ധതി നടപ്പിലാക്കുന്നത്.
എടിഎമ്മുമായി ട്രെയിൻ പരീക്ഷണ ഓട്ടം പൂർത്തിയാക്കി. യാത്രയ്ക്കിടെ ചില മേഖലകളിൽ മോശം സിഗ്നലുകൾ കാരണം നെറ്റ് വർക്കിൽ തകരാറുകൾ നേരിടേണ്ടി വന്നതൊഴിച്ചാൽ എ ടി എം പ്രവർത്തനത്തിന് മറ്റു പ്രശ്നങ്ങളൊന്നും നേരിടേണ്ടി വന്നിട്ടില്ലെന്നു റെയിൽവേ അധികൃതർ അറിയിച്ചു.
ട്രെയിനിലെ എ സി കോച്ചിലാണ് എ ടി എമ്മുള്ളത്. എന്നാൽ മറ്റ് 22 കോച്ചുകളിലെയും യാത്രക്കാർക്കു എടിഎം ഉപയോഗിച്ച് പണം പിൻവലിക്കാൻ കഴിയും. അക്കൗണ്ട് സ്റ്റേറ്റ്‌മെന്റുകളും എടിഎമ്മിൽ നിന്നു ലഭിക്കും. സുരക്ഷ ഉറപ്പാക്കാൻ സിസിടിവി ക്യാമറകൾ ഉൾപ്പെടെ സ്ഥാപിച്ചിട്ടുണ്ട്.