കാസര്കോട്: ക്വാര്ട്ടേഴ്സിനകത്ത് ഡബ്ബയില് സൂക്ഷിച്ചിരുന്ന ഒരു ലക്ഷം രൂപ കവര്ച്ച പോയതായി പരാതി. അണങ്കൂരിലെ റാസിഖ് ക്വാര്ട്ടേഴ്സില് താമസക്കാരനായ കര്ണ്ണാടക, വിജയപൂര്, നെരബെഞ്ചിയിലെ രമണ സിദ്ധപ്പയുടെ പരാതി പ്രകാരം കാസര്കോട് ടൗണ് പൊലീസ് കേസെടുത്ത് അന്വേഷണം തുടങ്ങി.
ചൊവ്വാഴ്ച പകലാണ് സംഭവം. പരാതിക്കാരന് രാവിലെ എട്ടിനു ജോലിക്കു പോയി വൈകുന്നേരം ആറിനു തിരിച്ചെത്തിയപ്പോഴാണ് പണം നഷ്ടപ്പെട്ട വിവരം അറിഞ്ഞത്. ക്വാര്ട്ടേഴ്സിന്റെ സീലിംഗ് ഇല്ലാത്ത ഭാഗം വഴിയാണ് മോഷ്ടാവ് അകത്തു കടന്നതെന്നു സംശയിക്കുന്നു. പണം സൂക്ഷിച്ചിട്ടുള്ളതു സംബന്ധിച്ച് കൃത്യമായ വിവരം അറിയുന്ന ആരെങ്കിലുമായിരിക്കും കവര്ച്ചയ്ക്കു പിന്നിലെന്നും സംശയമുണ്ട്.
